സുരക്ഷ ഉദ്യോഗസ്​ഥർക്ക്​ ഹറം മേധാവിയുടെ പ്രശംസ

മക്ക: ഇരുഹറമുകൾക്ക്​ സേവനം ചെയ്യുന്നതിലും വിശുദ്ധ ഭൂമിയെ സംരക്ഷിക്കുന്നതിലും  വലിയ ത്യാഗമാണ്​​ സുരക്ഷ ഉദ്യോഗസ്​ഥർ ചെയ്​തുകൊണ്ടിരിക്കുന്നതെന്ന്​ ​ ഇരുഹറം കാര്യാലയ മേധാവി ഡോ. അബ്​ദുറഹ്​മാൻ അൽസുദൈസ്​ പറഞ്ഞു. മക്ക പൊലീസ്​ മേധാവി ജനറൽ ഫഹദ്​ മുത്​ലഖ്​ അൽഉസൈമിയുമായുള്ള കൂടിക്കാഴ്​ചക്കിടയിലാണ്​ അദ്ദേഹം ഇക്കാര്യം പറഞ്ഞത്​. 

മക്ക പൊലീസിനും മറ്റ്​ സുരക്ഷ വിഭാഗങ്ങൾക്കും ഇരുഹറം കാര്യാലയത്തിനുമിടയിൽ സഹകരണത്തി​​െൻറ പാലം പണിയേണ്ടതി​​െൻറ ആവശ്യകത ഇരുഹറം കാര്യാലയ മേധാവി എടുത്തു പറഞ്ഞു. ഇതിലൂടെ തീർഥാടകർക്ക്​ മികച്ച സേവനം നൽകാനും സൗദി ഭരണാധികാരിയുടേയും കിരീടാവകാശിയുടേയും നിർദേശങ്ങൾ യാഥാർഥ്യമാക്കാനും സാധിക്കും. ധാരാളം അനുഗ്രഹങ്ങൾ ദൈവം ​കനിഞ്ഞു നൽകിയിട്ടുണ്ട്​. അതിലേറ്റവും പ്രധാനമാണ്​ സുരക്ഷയും സമാധാനവുമെന്നും അൽസുദൈസ്​ പറഞ്ഞു.