കാഴ്‌ചയുടെ വിസ്മയം വിടർത്തി പുഷ്പനഗരിയിൽ പക്ഷി പ്രദർശനം 

യാമ്പു: പക്ഷികളിൽ ഏറ്റവും ബുദ്ധി ശക്തിയുള്ളതും വർണങ്ങളിലും കാഴ്ചയിലും  വൈവിധ്യമേറിയതുമായ അപൂർവ തത്തകളെ അടുത്തറിയാൻ  അവസരമൊരുക്കി യാമ്പു പുഷ്പമേളയിലെ പക്ഷി പാർക്ക് . പക്ഷി വളർത്തലിൽ പ്രശസ്തരായ പത്ത്​ സൗദി യുവാക്കളാണ് തങ്ങളുടെ വളർത്തു തത്തകളുമായി മേളയിലെത്തിയത്​. പക്ഷികൾക്ക് അനുയോജ്യമായ പ്രകൃതിദത്ത ആവാസ വ്യവസ്ഥയോടെയാണ്​ ഇവിടെ പാർക്ക് സംവിധാനിച്ചിട്ടുള്ളത്. സ്വതന്ത്രമായി പറന്നു നടക്കാനും മര ചില്ലകളിൽ പറന്നിരിക്കാനും പക്ഷികൾക്ക്​ ഇവിടെ കഴിയുന്നു. നിലവിൽ ഇരുപതോളം തത്തകളാണ് പാർക്കിലുള്ളത്​. വരും നാളുകളിൽ വിവിധ ഇനങ്ങളിൽ പെട്ട കൂടുതൽ പക്ഷികൾ പാർക്കിലെത്തുമെന്ന് സംഘാടകർ പറഞ്ഞു.  പൂക്കളുടെ വിസ്മയം ആവോളം ആസ്വദിച്ച് ഇവിടെ എത്തുന്ന സന്ദർശകർക്ക് മറ്റൊരു കൗതുക കാഴ്‌ചയാണ്‌ ഈ പറവപാർക്ക്. സൗദിയിൽ തന്നെ അപൂർവ പക്ഷികൾക്ക് ഇങ്ങനെ ഒരുക്കിയ ആദ്യ പാർക്ക് ഇതാണെന്ന് പുഷ്പമേളയുടെ സംഘാടകർ പറഞ്ഞു.  പറവപാർക്ക്​ കാണാൻ പ്രത്യേക ടിക്കറ്റ്​ എടുക്കേണ്ടിവരും.