സൗദിയിൽനിന്ന്​ കേരളത്തിലേക്കുള്ള വന്ദേഭാരത വിമാന സർവിസുകൾ അവസാനനിമിഷം മാറ്റി  

റിയാദ്: ബുധനാഴ്​ച റിയാദിൽനിന്ന്​ കൊച്ചിയിലേക്കും വ്യാഴാഴ്​ച ദമ്മാമിൽനിന്ന്​ തിരുവനന്തപുരത്തേക്കും പോകേണ്ട വന്ദേ ഭാരത് മിഷനിലെ രണ്ട്​ എയർ ഇന്ത്യ  വിമാനങ്ങളും അവസാന നിമിഷം തീയതി മാറ്റി. ഒരു മുന്നറിയിപ്പുമില്ലാതെയുണ്ടായ ഇൗ മാറ്റം സൗദിയുടെ വിവിധ ഭാഗങ്ങളിൽനിന്ന്​ റിയാദിലും ദമ്മാമിലും എത്തിയ  യാത്രക്കാരെ വലച്ചു. 

ബുധനാഴ്​ച റിയാദിൽനിന്ന്​ കൊച്ചിയിലേക്ക് പോകേണ്ട എയർ ഇന്ത്യ വിമാനം ‘എ.ഐ 1932’ സാങ്കേതിക കാരണങ്ങളാൽ വെള്ളിയാഴ്​ചയിലേക്കും  (ജൂൺ 19) ദമ്മാമിൽനിന്ന്​ വ്യാഴാഴ്​ച തിരുവനന്തപുരത്തേക്ക് പോകേണ്ട ‘എ.ഐ 1942’ വിമാനം ശനിയാഴ്​ചയിലേക്കും ആണ് മാറ്റിയത്​. ഇങ്ങനെ സർവിസ്​ മാറ്റിയത്​  ചൊവ്വാഴ്​ച വൈകീട്ട്​ മാത്രമാണ് യാത്രക്കാരെ അറിയിച്ചത്. 

സൗദി അറേബ്യയിൽ രാത്രി സമയങ്ങളിലെ കർഫ്യു നിയന്ത്രണങ്ങൾ കാരണം കൊച്ചി വിമാനത്തിൽ പോകാൻ ഒരു ദിവസം മു​േമ്പ റിയാദിലെത്തി ഹോട്ടലിൽ കഴിയുന്ന ഗർഭിണികളടക്കമുള്ള യാത്രക്കാരാണ് പാതിവഴിയിൽ കുടുങ്ങിയത്. ഇവരിൽ പ്രായംചെന്നവരും രോഗികളും വിസ  കാലാവധി കഴിഞ്ഞ സന്ദർശന വിസക്കാരും ഉണ്ട്. കഴിഞ്ഞ ദിവസം റിയാദിൽ വൃക്ക സംബന്ധമായ അസുഖം മൂലം മരണമടഞ്ഞ മലയാളിയുടെ കുടുംബവും ഈ  വിമാനത്തിൽ പോകാൻ ടിക്കറ്റ് എടുത്തിരുന്നു. 

ബുറൈദ, ഹാഇൽ, ദാവാദ്​മി, ഹുത്ത സുദൈർ, മജ്‌മഅ, അൽഖർജ് തുടങ്ങിയ സ്ഥലങ്ങളിൽനിന്ന്​ റിയാദിൽ  എത്തിച്ചേർന്നവർക്കാണ് തിരിച്ചുപോകാനാകാതെ അടുത്ത മൂന്ന് ദിവസം കൂടി റിയാദിൽ കഴിയേണ്ട അവസ്ഥയുണ്ടായത്. 

റിയാദിൽനിന്ന്​ ബുധനാഴ്ച ഉച്ചക്ക് രണ്ടിന്​  പറക്കേണ്ട എ.ഐ 1932 വിമാനത്തിന് പകരം വെള്ളിയാഴ്​ച ഉച്ചക്ക്​ രണ്ടിന്​ എ.ഐ 0924 വിമാനമായിരിക്കും കൊച്ചിയിലേക്ക് പറക്കുക എന്ന് ഇന്ത്യൻ എംബസി വാർത്താക്കുറിപ്പിൽ  അറിയിച്ചു. നേരത്തെ ചുമതല നൽകിയിരുന്ന ചില ഉദ്യോഗസ്ഥർ ക്വാറൻറീനിൽ പോകേണ്ടി വന്നതിനാൽ പകരം ആളുകളെ നിയമിക്കാൻ കാലതാമസം വന്നതാണ് പ്രശ്​നമായതെന്ന്​ എയർ ഇന്ത്യ ഓഫിസിൽനിന്ന്​ അറിയാൻ സാധിച്ചത്.