തായ്​ലൻഡിൽ നിന്ന് ഹഷീഷുമായി ദമ്മാമിൽ, കൊണ്ടുവന്നയാളും സ്വീകരിക്കാനെത്തിയവരുമടക്കം ​അഞ്ച്​ മലയാളികൾ പിടിയിൽ

ദമ്മാം: തായ്​ലൻഡിൽനിന്ന്​ മൂന്ന് കിലോ ഹഷീഷുമായി ദമ്മാമിലെത്തിയ മലയാളി യുവാവിനെയും അയാളെ സ്വീകരിക്കാൻ വിമാനത്താവളത്തിലെത്തിയ മറ്റ്​ നാല്​ മലയാളികളെയും നർകോട്ടിക്​ കൺട്രോൾ വിഭാഗം പിന്തുടർന്ന്​ പിടികൂടി. ഉംറ വിസയിൽ തായ്‌ലൻഡിൽനിന്ന് ദമ്മാമിലെ കിങ് ഫഹദ്​ ഇൻറർനാഷനൽ എയര്‍പോർട്ടിൽ എത്തിയതാണ്​ കോഴിക്കോട്​ സ്വദേശിയായ യുവാവ്​. ഇയാളെ സ്വീകരിക്കാൻ മറ്റ്​ നാല് മലയാളികളും അവിടെയെത്തി. ഇമിഗ്രേഷൻ, ലഗേജ്​ ചെക്കിങ്​ നടപടികളെല്ലാം പൂർത്തിയാക്കി പുറത്തിറങ്ങിയ യുവാവിനെ നർക്കോട്ടിക്​ കൺട്രോൾ വിഭാഗം പിന്തുടർന്ന്​ നിരീക്ഷിച്ച് വഴിമധ്യേ പിടികൂടുകയായിരുന്നു. ഇയാളെ സ്വീകരിക്കാനെത്തിയവരും അക്കൂട്ടത്തിൽ പിടിയിലായി.

പൊലീസി​െൻറ നാടകീയമായ നീക്കത്തിലൂടെയാണ്​ പ്രതികളെയെല്ലാം വലയിലാക്കിയത്​. അറസ്​റ്റ്​ രേഖപ്പെടുത്തി അനന്തര നടപടികൾക്കായി പബ്ലിക്​ പ്രോസിക്യൂഷന്​ കൈമാറും. സൗദിയിൽ മയക്കുമരുന്ന്​ കടത്ത്​ വധശിക്ഷ വരെ ലഭിക്കാവുന്ന കൊടും കുറ്റമാണ്​. മയക്കുമരുന്നിനും ലഹരിക്കുമെതിരെ രാജ്യം യുദ്ധം പ്രഖ്യാപിച്ചിരിക്കുകയാണ്​. കുറ്റവാളികളോട്​ ഒരു വിട്ടുവീഴ്​ചയമുല്ലാത്തതാണ്​ സമീപനം. ദിനംപ്രതി നിരവധിപേരാണ്​ പിടിയലാകുന്നത്​. നേരത്തെ പിടിയിലായി ശിക്ഷ വിധിക്കപ്പെട്ടവരുടെയെല്ലാം വധശിക്ഷ യഥാസമയം നടപ്പാക്കുന്നുമുണ്ട്​. അതിനിടയിലാണ്​ മലയാളി യുവാക്കളും ഇപ്പോൾ കുടുങ്ങിയിരിക്കുന്നത്​.