കൊച്ചിയിൽനിന്നുള്ള ആദ്യസംഘം ജിദ്ദയിലെത്തി; മക്കയിൽ ഇതുവരെ 6000ലേറെ ഹാജിമാർ

മക്ക: ഇതുവരെ 6000ലേറെ മലയാളി ഹാജിമാർ മക്കയിലെത്തി. സംസ്ഥാന ഹജ്ജ് കമ്മിറ്റിക്ക്​ കീഴിൽ കൊച്ചി വഴിയും തീർഥാടകരുടെ വരവ്​ ആരംഭിച്ചു. 289 പേരുമായി നെടുമ്പാശ്ശേരിയിൽനിന്ന്​ ആദ്യ വിമാനം (സൗദി എയർലൈൻസ്) വെള്ളിയാഴ്ച രാത്രി 9.20ന് ജിദ്ദ കിങ്​ അബ്​ദുൽ അസീസ്​ അന്താരാഷ്​ട്ര വിമാനത്താവളത്തിലെത്തി. ടെർമിനൽ ഒന്നിൽ ഇറങ്ങിയ തീർഥാടകരെ ഹറമൈൻ ഹൈ സ്പീഡ് ട്രെയിൻ വഴി മക്കയിലെത്തിച്ചു. ജിദ്ദ വിമാനത്താവളത്തിൽനിന്ന്​ മക്കയിലേക്ക് ഹറമൈൻ ട്രെയിനിൽ യാത്ര ചെയ്ത, ഈ വർഷത്തെ ആദ്യ ഇന്ത്യൻ തീർഥാടകരായി കൊച്ചിയിൽനിന്നെത്തിയ ഈ സംഘം.

മികച്ച സൗകര്യങ്ങളോടെ എളുപ്പത്തിൽ മക്കയിലെത്താനാവും എന്നതാണ് ഹറമൈൻ ​െട്രയിനി​െൻറ പ്രത്യേകത. ഇതുവരെ എത്തിയവരെയെല്ലാം ബസുകളിലാണ്​ മക്കയിലേക്ക്​ കൊണ്ടുവന്നിരുന്നത്​. ഇനി ഹറമൈൻ ട്രയിനിലും യാത്ര അനുവദിക്കും. അത്​ തീർഥാടകർക്ക്​ കൂടുതൽ മികച്ച അനുഭവവും സൗകര്യവുമാണ്​. ജിദ്ദ വിമാനത്താവളത്തിനുള്ളിൽ തന്നെയാണ്​ ഹറമൈൻ ​റെയിൽവേ സ്​റ്റേഷൻ. അറൈവൽ ടെർമിനലിൽനിന്ന്​ തന്നെ നേരെ വളരെയെളുപ്പത്തിൽ ട്രയിനിന്​ അടുത്തെത്താം. കുറഞ്ഞ സമയം കൊണ്ട്​ മക്കയിലെത്താനുമാവും.

കേരള ഹജ്ജ്​ കമ്മിറ്റിക്ക് കീഴിൽ ഇതുവരെ കോഴിക്കോട്​, കണ്ണൂർ എന്നിവിടങ്ങളിൽനിന്നാണ്​ തീർഥാടകർ എത്തിക്കൊണ്ടിരുന്നത്​. മൂന്നാമത്തെ എംബാർക്കേഷൻ പോയിൻറായ നെടുമ്പാശ്ശേരിയിൽനിന്ന്​ കൂടി ആരംഭിച്ചതോടെ മലയാളി തീർഥാടകർക്ക്​ വരാനുള്ള വഴികളെല്ലാം തുറന്നുകഴിഞ്ഞു.​

വെള്ളിയാഴ്ച രണ്ട് സൗദി എയർലൈൻസ് വിമാനങ്ങളാണ് കൊച്ചിയിൽനിന്ന്​ ജിദ്ദയിലേക്ക് വന്നത്. രണ്ടാമത്തെ വിമാനം രാത്രി 11.30ന് ജിദ്ദയിലെത്തി. ഇതിലെ യാത്രക്കാരെയും ട്രെയിൻ മാർഗമാണ് മക്കയിൽ എത്തിച്ചത്. ഇന്ത്യൻ കോൺസൽ ​ജനറൽ ഫഹദ്​ അഹ്​മദ്​ ഖാൻ സൂരിയുടെ നേതൃത്വത്തിൽ ​തീർഥാടകരെ സ്വീകരിക്കാൻ രാത്രിയിൽ ടെർമിനൽ ഒന്നിൽ ഹജ്ജ്​ മിഷൻ ഉദ്യോഗസ്​ഥരും ബന്ധപ്പെട്ട സൗദി ഉദ്യോഗസ്​ഥരും എത്തിയിരുന്നു. പിന്നീട്​ ഹൈസ്പീഡ് ട്രെയിനിൽ തീർഥാടകരെ യാത്രയാക്കാനും സ്വീകരിക്കാനും ഉദ്യോഗസ്ഥരും കെ.എം.സി.സി ഉൾപ്പെടെയുള്ള സന്നദ്ധപ്രവർത്തകരും ജിദ്ദ എയർപോർട്ടിലും മക്ക റെയിൽവേ സ്​റ്റേഷനിലും നിലയുറപ്പിച്ചിരുന്നു. ഇനിയുള്ള ദിവസങ്ങളിലും ഇവർ ഇവിടങ്ങളിലെ സേവനനിരതരായിരിക്കും. മക്കയിലെത്തിയ തീർഥാടകരെ ഹജ്ജ് സർവിസ് കമ്പനി ഒരുക്കിയ ബസ്​ മാർഗമാണ് താമസകേന്ദ്രങ്ങളിൽ എത്തിച്ചത്. മക്കയിലെ റെയിൽവേ സ്​റ്റേഷനിൽ ഹാജിമാർക്കായി പ്രത്യേക സൗകര്യങ്ങൾ ഏർപ്പെടുത്തിയിട്ടുണ്ട്.