ദമ്മാമിൽ ബഹുനില വാണിജ്യ കെട്ടിട സമുച്ചയത്തിൽ തീപിടിത്തം

ദമ്മാം: സൗദി കിഴക്കൻ പ്രവിശ്യയുടെ വാണിജ്യ സിരാകേന്ദ്രമായ ദമ്മാം അൽ അമാമ്ര ഏരിയയിൽ സ്ഥിതി ചെയ്യുന്ന പ്രമുഖ വാണിജ്യ സമുച്ചയത്തിൽ തീപിടിത്തം. നഗര ഹൃദയഭാഗത്ത് മലയാളികളടക്കം നിരവധി വ്യവസായികളുടെ പ്രധാന ഓഫീസുകളും അനുബന്ധ സ്ഥാപനങ്ങളും പ്രവർത്തിക്കുന്ന, 30-ാഒളം നിലകളുള്ള കെട്ടിടത്തിലാണ് ശനിയാഴ്​ച രാത്രിയോടെ തീപിടിത്തമുണ്ടായത്​. ആളപായം റിപ്പോർട്ട്​ ചെയ്യപ്പെട്ടിട്ടില്ല.

കെട്ടിടത്തി​െൻറ ഏറ്റവും മുകളിലത്തെ നിലയിലാണ് തീ പിടിച്ചതെന്നാണ്​ വിവരം. അപകടത്തി​െൻറ കൃത്യമായ കാരണം ഇതുവരെ വ്യക്തമായിട്ടില്ല.

വിവരമറിഞ്ഞ ഉടൻ തന്നെ സിവിൽ ഡിഫൻസ് യൂനിറ്റുകളും പൊലീസും സ്ഥലത്തെത്തി തീയണയ്ക്കാനുള്ള അടിയന്തര നടപടികൾ സ്വീകരിച്ചു. നിലവിൽ തീപിടിത്തം നിയന്ത്രണവിധേയമാക്കാനുള്ള തീവ്രശ്രമങ്ങൾ തുടരുകയാണെന്ന്​ ജനറൽ ഡയറക്ടറേറ്റ് ഓഫ് ട്രാഫിക് അറിയിച്ചു. അപകടസ്ഥലത്ത് സിവിൽ ഡിഫൻസിന്റെ രക്ഷാപ്രവർത്തനങ്ങളും സുരക്ഷാ ഏകോപനങ്ങളും ഊർജ്ജിതമായി പുരോഗമിക്കുകയാണ്.