മണലാരണ്യത്തിൽ കുതിരക്കുളമ്പടി; അൽഉല ഡെസേർട്ട് പോളോയ്ക്ക് ആവേശകരമായ തുടക്കം

അൽഉല: ലോകകായിക ഭൂപടത്തിൽ ശ്രദ്ധാകേന്ദ്രമായി മാറുന്ന അൽഉലയിൽ, അഞ്ചാമത് ‘ഡെസേർട്ട് പോളോ’ ചാമ്പ്യൻഷിപ്പിന് പൊടിപറത്തിയ തുടക്കം. ചരിത്രപ്രസിദ്ധമായ അൽഫുർസാൻ ഇക്വസ്ട്രിയൻ വില്ലേജിൽ നടന്ന ചടങ്ങിൽ പ്രമുഖ വ്യക്തിത്വങ്ങളുടെ സാന്നിധ്യത്തിലാണ് ടൂർണമെൻറിന് ആരംഭമായത്. അൽഉല റോയൽ കമീഷനാണ്​ സംഘാടകർ. ആറ്​ ടീമുകളിലായി ലോകത്തിലെ ഏറ്റവും മികച്ച 18 പോളോ താരങ്ങളാണ്​ മാറ്റുരക്കുന്നത്​. മൂന്ന് ദിവസങ്ങളിലായി ആകെ ഒമ്പത്​ പോരാട്ടങ്ങളാണ്​ നടക്കുന്നത്​.

ലോകത്തെ പ്രീമിയർ ഡെസേർട്ട് പോളോ ഡെസ്​റ്റിനേഷനായി മാറിയ അൽഉലയിൽ, കായിക വീര്യത്തിനൊപ്പം സാംസ്കാരിക പൈതൃകവും ഒത്തുചേരുന്നു എന്നതാണ് ഈ ടൂർണമെൻറി​െൻറ പ്രത്യേകത. വൻതോതിലുള്ള പ്രാദേശിക-അന്തർദേശീയ മാധ്യമങ്ങളുടെ സാന്നിധ്യം ഇത്തവണത്തെ മത്സരങ്ങൾക്ക് ആഗോള ശ്രദ്ധ ഉറപ്പാക്കുന്നു. മത്സരങ്ങൾക്കൊപ്പം അതിഥികൾക്കായി ഒരുക്കിയിരിക്കുന്ന ആഡംബരപൂർണമായ വിനോദപരിപാടികളും ടൂർണമെൻറിനെ വ്യത്യസ്തമാക്കുന്നു.

സൗദി അറേബ്യയുടെ വിനോദസഞ്ചാര-കായിക ഭാവിയുടെ പ്രതിഫലനമായാണ് ഈ ചാമ്പ്യൻഷിപ്പ് വിലയിരുത്തപ്പെടുന്നത്. അൽഉലയുടെ തനതായ ഭൂപ്രകൃതിയെ ലോകോത്തര കായിക മത്സരങ്ങളുമായി സംയോജിപ്പിക്കുന്നതിലൂടെ, 2026-ഓടെ ലോകത്തെ ഏറ്റവും മികച്ച സ്പോർട്സ് ടൂറിസം കേന്ദ്രങ്ങളിലൊന്നായി ഈ നഗരത്തെ മാറ്റാനാണ് രാജ്യം ലക്ഷ്യമിടുന്നത്.