സുഡാനിൽനിന്ന്​ ഇന്ത്യക്കാരെ ഒഴിപ്പിക്കൽ; വി. മുരളീധരൻ ജിദ്ദയിലെത്തി

ജിദ്ദ: അഭ്യന്തര സംഘർഷം രൂക്ഷമായ സുഡാനിൽനിന്ന്​ ഇന്ത്യൻ കപ്പലുകളിൽ ജിദ്ദയിലെത്തിക്കുന്ന പൗരന്മാർക്ക്​ താമസമൊരുക്കുന്നതിനും വിമാനങ്ങളിൽ അവരെ നാട്ടിലെത്തിക്കാനുമുള്ള പ്രവർത്തനങ്ങൾ ആരംഭിച്ചു. വിദേശകാര്യ സഹമന്ത്രി വി. മുരളീധരൻ ജിദ്ദയിലെത്തി. റിയാദിലെ ഇന്ത്യൻ എംബസിയിൽനിന്ന് അംബാസഡർ ഡോ. സുഹേൽ അജാസ്​ ഖാൻ,​ ഡെപ്യൂട്ടി ചീഫ്​ ഓഫ്​ മിഷൻ എൻ. രാംപ്രസാദ്​ തുടങ്ങിയവരും ജിദ്ദയിലെത്തി പ്രവർത്തനങ്ങളിൽ പങ്കാളിത്തം വഹിക്കുന്നു​. ജിദ്ദയിലെ ഇന്ത്യൻ കോൺസുലേറ്റ്​ ജനറൽ ഷാഹിദ്​ ആലവും പ്രവർത്തനങ്ങളുടെ ഏകോപനവുമായി രംഗത്തുണ്ട്​.

അതേസമയം ഇന്ന്​ രാത്രി എ​ട്ടോടെ ജിദ്ദ തുറമുഖത്ത്​ ഇന്ത്യൻ നാവിക സേനയുടെ െഎ.എൻ.എസ്​ സുമേധ എന്ന കപ്പലിൽ എത്തുന്ന 278 ഇന്ത്യൻ പൗരന്മാരെ സ്വീകരിക്കുന്നതിനും അവർക്ക്​ താമസസൗകര്യമൊരുക്കുന്നതിനും മന്ത്രിയുടെയും നയതന്ത്ര ഉദ്യോഗസ്ഥരുടെയും നേതൃത്വത്തിൽ ആവശ്യമായ നടപടികളെല്ലാം കൈകൊണ്ടുകഴിഞ്ഞു. മലയാളികൾക്ക് പുറമെ, തമിഴ്​നാട്​, ഉത്തർ പ്രദേശ്, ബിഹാർ സംസ്ഥാനങ്ങളിൽനിന്നുള്ളവരാണ്​ ജിദ്ദയിലെത്തുന്ന ആദ്യ സംഘത്തിലുള്ളത്​.

ഇങ്ങനെ വരുന്നവർക്ക്​ ജിദ്ദയിലെ ഇൻറർനാഷനൽ ഇന്ത്യൻ സ്കൂളിലാണ് താൽക്കാലിക താമസസൗകര്യം ഒരുക്കുന്നത്​. ഇതിനായി സ്​കൂളിലെ ആൺകുട്ടികളുടെ വിഭാഗത്തിന്​ ബുധനാഴ്​ച മുതൽ അനിശ്ചിത കാലത്തേക്ക്​ അവധി നൽകിയിട്ടുണ്ട്​. ഇനി ഒരു അറിയിപ്പ്​ ഉണ്ടാകുന്നതുവരെ ഒന്നു മുതൽ 12 വരെ ക്ലാസുകളിലെ വിദ്യാർഥികൾക്ക്​ ഓൺലൈനിലായിരിക്കും ക്ലാസ് എന്ന്​ സ്​കൂൾ അധികൃതർ അറിയിച്ചു.