എസ്​മ ചികിത്സാ ഉപകരണ അളവ്​ മാനദണ്ഡം നിശ്ചയിച്ചു

അബൂദബി: സ്വകാര്യ ആശുപ​ത്രികൾ, ക്ലിനിക്കുകൾ, മെഡിക്കൽ സ​​െൻററുകൾ എന്നിവിടങ്ങളിലെ ചികിത്സാ ഉപകരണങ്ങളുടെ കൃത്യത പരിശോധിക്കുന്നതിന്​ എമിറേറ്റ്​സ്​ സ്​റ്റാൻഡേഡൈസേഷൻ-മെട്രോളജി അതോറിറ്റി (എസ്​മ) അളവ്​ മാനദണ്ഡം നിശ്ചയിച്ചു. ജി.സി.സി തലത്തിൽ ആദ്യമായാണ്​ ചികിത്സാ ഉപകരണങ്ങളുടെ അളവ്​ മാനദണ്ഡം നിശ്ചയിക്കുന്നത്​. 

ചികിത്സാ ഉപകരണങ്ങളുടെ കൃത്യത നിരീക്ഷിക്കുന്നതിനുള്ള പതിവ്​ പരിശോധന ആരംഭിച്ചത്​ അറിയിക്കാൻ എസ്​മ ജീവനക്കാർ രാജ്യത്തെ സ്വകാര്യ ആശുപത്രികളിലും ക്ലിനിക്കുകളിലും സന്ദർശനം നടത്തിയതായി എസ്​മ ഡയറക്​ടർ ജനറൽ അബ്​ദുല്ല ആൽ മഇൗനി അറിയിച്ചു. ഉപഭോക്​താക്കളുടെ അവകാശ സംരംക്ഷണം ഉറപ്പാക്കുന്നതിനും അവർക്ക്​ മികച്ച സേവനം ലഭ്യമാക്കുന്നതിനും​ വേണ്ടിയാണ്​ നടപടി. ഇതു സംബന്ധിച്ച്​ നഗരസഭകളുടെ സഹകരണത്തോടെ രാജ്യവ്യാപകമായി കാമ്പയിൻ ആരംഭിക്കും. ദുബൈ എമിറേറ്റിലാണ്​ കാമ്പയിൻ ആരംഭിക്കുകയെന്നും അബ്​ദുല്ല ആൽ മഇൗനി പറഞ്ഞു.