മരുഭൂമിയിൽ കുടുങ്ങിയ എൻജിനീയർ നാട്ടിലേക്ക്​ മടങ്ങി

ദമ്മാം: മെക്കാനിക്കൽ എൻജിനീയർ ജോലിക്കായി കൊണ്ടുവന്ന് മരുഭൂമിയിലെ ഡ്രൈവറാക്കി മാറ്റിയ മലയാളി യുവാവ് സാമൂഹിക പ്രവർത്തകരുടെ സഹായത്തോടെ നാടണഞ്ഞു. തിരുവനന്തപുരം സ്വദേശിയായ സന്തോഷാണ് പ്രവാസത്തി​​െൻറ ദുരിതങ്ങൾ താണ്ടി നാട്ടിലേക്ക്​ മടങ്ങിയത്. രണ്ടു വർഷം മുമ്പാണ് സന്തോഷ് മെക്കാനിക്കൽ എൻജിനീയർ വിസയിൽ ജോലിക്കായി സൗദിയിലെത്തിയത്. 

സ്വകാര്യ നിർമാണ കമ്പനിയിൽ 3500 റിയാൽ ശമ്പളവും ആനുകൂല്യങ്ങളും ആയിരുന്നു ഏജൻറി​​െൻറ വാഗ്ദാനം. സർവീസ് ചാർജായി ഭീമമായ തുകയും ഏജൻറ്​ കൈപ്പറ്റി. എന്നാൽ സൗദിയിലിറങ്ങിപ്പോൾ സ്പോൺസർ വിമാനത്താവളത്തിൽ നിന്ന്​ സന്തോഷിനെ ഒരു മരുഭൂമിയിലെ മണൽക്വാറിയിലേക്കാണ്​ കൂട്ടികൊണ്ടുപോയത്. മണൽ കയറ്റിക്കൊണ്ടു പോകുന്ന ലോറി ഡ്രൈവറുടെ ​േജാലിയാണ്​ സന്തോഷിന് നൽകിയത്. ആദ്യം പ്രതിഷേധിച്ചെങ്കിലും നാട്ടിലെ സാമ്പത്തിക പരാധീനതകൾ കാരണം സന്തോഷിന് ആ ജോലിയിൽ തുടരേണ്ടി വന്നു. ഇഖാമയോ ലൈസൻസോ നൽകിയിരുന്നില്ല. രണ്ടു വർഷത്തോളം അവിടെ ജോലി ചെയ്തപ്പോഴേക്കും ഒമ്പതു മാസത്തെ ശമ്പളം കുടിശ്ശികയായി. അവധിക്ക്​ പോവാനും സ്​പോൺസർ സമ്മതിച്ചില്ല. നാട്ടിലെ ബന്ധുക്കൾ വഴി പ്രവാസ സംഘടനകളെ സമീപിച്ചെങ്കിലു ഫലമുണ്ടായില്ല. 

പിന്നീട്​,​ ഒരു ദിവസം വൈകിട്ട് സന്തോഷ് മണൽ കയറ്റിക്കൊണ്ടു പോകുന്ന വഴി ഹൈവേയിലെത്തി ലോറി നിർത്തിയിട്ട്  മറ്റൊരു വാഹനത്തിന് കൈകാണിച്ച്​ അതിൽ ഹസയിലെ ലേബർ കോടതിയിലെത്തി. കോടതിയുദ്യോഗസ്​ഥനോട്​ വിഷയം ധരിപ്പിക്കുകയും അദ്ദേഹം​ നവയുഗം ഹസ മേഖല ജീവകാരുണ്യവിഭാഗം കൺവീനർ അബ്​ദുൽ ലത്തീഫ് മൈനാഗപ്പളിയെ ബന്ധപ്പെടാനാവശ്യപ്പെടുടയും ചെയ്​തു. തുടർന്ന്​, സാമൂഹ്യ ​​പ്രവർത്തകരുടെ സഹായത്തോടെ ​േകാടതിയിൽ കേസ്​ ഫയൽ ചെയ്​തു. കോടതിയിൽ കേസ് വിളിച്ചപ്പോൾ ഹാജരാകാതിരുന്ന സ്പോൺസർ  വാറൻറ്​ പുറപ്പെടുവിച്ചപ്പോൾ മൂന്നാമത്തെ സിറ്റിങ്ങിൽ ഹാജരായി. 
നടപടിക്രമങ്ങൾക്കൊടുവിൽ സന്തോഷിന് ഫൈനൽ എക്​സിറ്റും വിമാനടിക്കറ്റും ആറുമാസത്തെ കുടിശ്ശിക ശമ്പളവും നൽകാൻ കോടതി വിധിച്ചു. അനുകൂല വിധി വന്നതോടെ നിയമനടപടികൾ പൂർത്തിയാക്കി സന്തോഷ് നാട്ടിലേക്ക്​ മടങ്ങി.