വൈദ്യുതിനിരക്ക്​ വർധിപ്പിച്ചെന്ന പ്രചാരണം അധികൃതർ നിഷേധിച്ചു

ജിദ്ദ: വൈദ്യുതിനിരക്ക്​ വർധിപ്പിച്ചെന്ന പ്രചാരണം ഇലക്ട്രിസിറ്റി റഗുലേറ്ററി അതോറിറ്റി നിഷേധിച്ചു. ട്വിറ്ററിലാണ് ഇക്കാര്യം രേഖപ്പെടുത്തിയത്. ഇതുപോലെയുള്ള കാര്യങ്ങളിൽ മന്ത്രിസഭയാണ് തീരുമാനമെടുക്കേണ്ടത്. വൈദ്യുതി ചാർജ്​ നിരക്കിൽ നിലവിൽ മാറ്റമില്ല.  ഇലക്ട്രിസിറ്റി കമ്പനിക്ക് ഇൗ വിഷയത്തിൽ സ്വയം തീരുമാനമെടുക്കാൻ സാധ്യമല്ല. പ്രത്യേക വ്യവസ്​ഥക്ക് വിധേയമായിരിക്കണം. മന്ത്രിസഭയുടെ അംഗീകാരമില്ലാതെ തീരുമാനം നടപ്പാക്കാനാവില്ലെന്നും വൈദ്യുതി റഗുലേറ്ററി അതോറിറ്റി വ്യക്തമാക്കി. തൊഴിലാളികളെ കുറക്കുന്നതിൽ  പങ്കുണ്ടെന്ന പ്രചാരണവും അതോറിറ്റി നിഷേധിച്ചു. തൊഴിലാളികളെ കൂട്ടുന്നതിലും കുറക്കുന്നതിലും റഗുലേറ്ററി അതോറിറ്റിക്ക് ഒരു ബന്ധവുമില്ല. അത് കമ്പനിയുടെ ഉത്തരവാദിത്തത്തിൽപെട്ടതാണ്. തൊഴിലാളികളുടെ പരാതികളുമായും അതോറിറ്റിക്ക്​ ബന്ധമില്ലെന്നും അതിനെല്ലാം പ്രത്യേക വകുപ്പുകളുണ്ടെന്നും അധികൃതർ വ്യക്തമാക്കി.