ഈസ്​റ്റർ ആഘോഷിച്ച്​ പ്രവാസി സമൂഹം

ദമ്മാം: ഈസ്​റ്റർ ആഘോഷിച്ച്​ സൗദിയിലെ പ്രവാസി സമൂഹം. മുൻകാലങ്ങളിൽനിന്ന്​ വ്യത്യസ്​തമായി ക്രിസ്​ത്യൻ പ്രവാസികൾക്ക്​​ ആശംസകളുമായി സൗദി സമൂഹവുമെത്തി. സമൂഹങ്ങൾക്കിടയിൽ സഹവർത്തിത്വവും സൗഹാർദവും പ്രോത്സാഹിപ്പിക്കുന്നതിനുള്ള രാജ്യത്തിന്റെ നീക്കങ്ങളോട്​ ചേർന്ന്​ സൗദിയിൽ പ്രവാസികൾ ആഘോഷിക്കുന്ന വ്യത്യസ്ത ആഘോഷങ്ങളെക്കുറിച്ച്​ അറിയാനും അതിനോടൊപ്പം പങ്കുചേരാനും സ്വദേശികളും അടുത്തിടെ ഏറെ താൽപര്യം കാട്ടുന്നുണ്ട്​. അത്​ ഈസ്​റ്റർ ആഘോഷത്തിലും പ്രകടമായിരുന്നു.

മുസ്​ലിം വേൾഡ് ലീഗ്​ അധ്യക്ഷൻ ശൈഖ്​ ഡോ. മുഹമ്മദ് അൽ-ഇസ കഴിഞ്ഞ ഡിസംബറിൽ, ക്രിസ്ത്യാനികൾക്ക് ആശംസകൾ അറിയിക്കുന്നതിൽ നിന്ന് മുസ്ലീങ്ങളെ വിലക്കുന്ന ഒരു വാചകവും ശരീഅത്ത് നിയമത്തിലില്ലെന്ന് വ്യക്തമാക്കിയിരുന്നു. ഇത വിശ്വാസികളെ അവരുടെ ആഘോഷാവസരങ്ങളിൽ അഭിനന്ദിക്കുന്നത് ഇസ്‌ലാമി​െൻറ മാനുഷികവും സൗഹാർദപരവുമായ മുഖത്തെ പ്രതിഫലിപ്പിക്കുന്നതാണന്നും അദ്ദേഹം പറഞ്ഞിരുന്നു. ഇത്തരം ആശംസക​ളിലൂടെ ലോകത്ത് സഹവർത്തിത്വവും ഐക്യവും പ്രോത്സാഹിപ്പിക്കപ്പെടേണ്ട ഒരു കാലത്താണ്​ നമ്മൾ ഉള്ളതെന്നും അന്നദ്ദേഹം വ്യക്തമാക്കി.

ഈസ്​റ്റർ ആഘോഷവുമായി ബന്ധപ്പെട്ട അലങ്കാര വസ്​തുക്കൾ വിൽക്കുന്ന നിരവധി കടകൾ ഇത്തവണ സൗദിയിൽ പ്രത്യക്ഷപ്പെട്ടിരുന്നു. വിദേശികൾക്കൊപ്പം സ്വദേശികളും ഇത്തരം അലങ്കാര വസ്​തുക്കൾ വാങ്ങാൻ താൽപര്യം കാണിച്ചതായി വ്യാപാരികൾ പറഞ്ഞു. കിഴക്കൻ പ്രവിശ്യയിലെ അൽഅഹ്‌സ മാൾ, മാൾ ഓഫ് ദഹ്‌റാൻ, അൽനഖീൽ ദമ്മാം മാൾ എന്നിവയുൾപ്പെടെ രാജ്യത്തെ പല സ്ഥലങ്ങളിലും പ്രവർത്തിക്കുന്ന ​ഷോപ്പുകളിൽ എഗ്ഗ് ഹണ്ട് അവാർഡുകൾ, മുട്ട കളർ ചെയ്യാനുള്ള ഇനങ്ങൾ, ബണ്ണി ബാസ്‌ക്കറ്റുകൾ, മതിൽ അലങ്കാരങ്ങൾ എന്നിവയും അതിലേറെയും ഉൾപ്പെടെ ഈസ്​റ്റർ ചൈതന്യം ഉൾക്കൊള്ളുന്ന നിരവധി വസ്​തുക്കൾ ഇത്തവണ വ്യാപകമായി വിറ്റുപോയി.

ദി വ്യൂ മാളിലും റിയാദിലെ അൽ നഖീൽ മാളിലും ജിദ്ദയിലെ മാൾ ഓഫ് അറേബ്യയിലും സമാനമായ രീതിയിൽ ഷോപ്പുകളിൽ ഈ വസ്​തുക്കൾ വിറ്റു. ഈസ്​റ്റർ ഡിന്നറിൽ പ്രിയപ്പെട്ട ഇനമായ മട്ടൻ, അരി, തൈര് എന്നിവ ഉപയോഗിച്ച് നിർമിച്ച പരമ്പരാഗത വിഭവം മൻസഫ് റിയാദിലെ റസ്​റ്റോറൻറുകളിൽ വ്യാപകമായി വിറ്റഴിഞ്ഞു. റിയാദിലെ അൽകോഫിയ റെസ്​റ്റോറൻറ്​, ബെയ്റ്റ് ഉമർ, ഷാമയ, അവാനി, അൽ മൻസഫ് റെസ്​റ്റോറൻറ്​, ബെയ്​ത്​ അൽ മൻസഫ് എന്നിവിടങ്ങളിലാണ്​ ഈ വിഭവം അണിനിരന്നത്​. റൊട്ടിയിൽ ചുട്ടുപഴുപ്പിച്ച കോഴിയിറച്ചിയുടെ ഫലസ്തീൻ വിഭവമായ മുസാഖാൻ തുടങ്ങിയ ഈസ്​റ്റർ വിഭവങ്ങളും രാജ്യത്തി​െൻറ വിവിധ ഭാഗങ്ങളിലെ റെസ്​റ്റോറൻറുകൾ തയ്യാറാക്കിയിരുന്നു.

പരമ്പരാഗത ഭക്ഷണങ്ങൾ പങ്കുവെക്കുമ്പോൾ ക്രിസ്ത്യൻ അറബ് കുടുംബങ്ങൾക്കും സുഹൃത്തുക്കൾക്കും ഒത്തുചേരാനുള്ള അവസരങ്ങൾ കൂടിയാണ്​ ലഭ്യമാകുന്നത്​. കൂടാതെ കുടുംബങ്ങൾ പരസ്​പരം മുട്ടകൾ, മധുരപലഹാരങ്ങൾ, മറ്റ് പലഹാരങ്ങൾ എന്നിവ നിറച്ച ഈസ്​റ്റർ കൊട്ടകൾ പരസ്​പരം കൈമാറി.