ഹറം മുറ്റങ്ങളിലും മത്വാഫിലും തണലൊരുക്കാൻ പദ്ധതി​; നിർമാണം ഹജ്ജിന്​ ശേഷം

ജിദ്ദ: മക്ക ഹറം മുറ്റങ്ങളിലും മത്വാഫിലും തണലൊരുക്കുന്ന പദ്ധതി ഇൗ വർഷത്തെ ഹജ്ജ്​ കഴിഞ്ഞാലുടൻ ആരംഭിക്കുമെന്ന ്​ ഇരുഹറം കാര്യാലയ മേധാവി ഡോ. അബ്​ദുറഹ്​മാൻ അൽസുദൈസ്​ അറിയിച്ചു. ‘വിശുദ്ധ ഭൂമിയും മീഡിയയും’ എന്ന തലക്കെട്ടിൽ നടന്ന മാധ്യമ പ്രവർത്തകരുമായി കൂടിക്കാഴ്​ച നടത്തുകയായിരുന്നു​ അദ്ദേഹം. അടുത്ത വർഷം റമദാന്​ മുമ്പ്​ പൂർത്തിയാക്കും. ഇൗ വർഷത്തെ റമദാനെ വരവേൽക്കാനുള്ള ഒരുക്കങ്ങളെയും മറ്റ്​ പ്രവർത്തനങ്ങളെയും സംബന്ധിച്ചും അദ്ദേഹം വിശദീകരിച്ചു. വിവിധ വകുപ്പുകളുടെ സഹകരണത്തോടെ​ ‘വിഷൻ 2030’​​െൻറ ഭാഗമായി വിപുലമായ സേവനങ്ങൾക്കാണ്​ പദ്ധതി ആവിഷ്​ക്കരിച്ചിരിക്കുന്നത്​. തീർഥാടകർക്ക്​ മികച്ച സേവനസൗകര്യമൊരുക്കും.

അടുത്തിടെ സൗദി കിരീടാവകാശി അമീർ മുഹമ്മദ്​ ബിൻ സൽമാൻ ഹറം സന്ദർശിച്ചിരുന്നു​. അത്​ ഇരുഹറം വികസന പദ്ധതികളുടെ നിർമാണ പ്രവർത്തനങ്ങളെ ത്വരിതഗതിയിലാക്കിയിരുന്നു. രാജ്യം പ്രഥമ പരിഗണന നൽകുന്നത്​ ഇരുഹറമുകളുമായി ബന്ധപ്പെട്ട വിഷയങ്ങൾക്കാണ്​​. കിരീടാവകാശിയുടെ സന്ദർശന ശേഷം പൂർത്തീകരിക്കാനുള്ള നടപടികൾ അതിവേഗം പുരോഗമിക്കുകയാണ്​. തീർഥാടകർക്ക്​ വേഗത്തിലും മികച്ചതുമായ സേവനങ്ങൾ ലഭ്യമാക്കാൻ നിരവധി കാമ്പയിനുകൾ സംഘടിപ്പിച്ചു​. അത്​ നല്ല ഫലം ഉണ്ടായിട്ടുണ്ടെന്നും അദ്ദേഹം പറഞ്ഞു.

റമദാനിലെ പ്രത്യേക സേവനത്തിന്​ സ്​ത്രീകളും പുരുഷന്മാരുമായി 10,000ത്തിലധികം പേർ രംഗത്തുണ്ടാകും. ഏകീകൃത ടെലിഫോൺ സേവന സൗകര്യം ആരംഭിച്ചിട്ടുണ്ട്​. 60ഒാളം വകുപ്പുകൾ സേവനനിരതമായി രംഗത്തുണ്ടാകും. ഹറം ലൈബ്രററിയുടെ ഡിജിറ്റലൈസേഷൻ പൂർത്തിയായി. അരലക്ഷം പുതിയ നമസ്​കാര വിരിപ്പുകൾ വിരിച്ചു. വികസന നടപടികൾ പൂർത്തിയായ ഭാഗങ്ങളിൽ തീർഥാടകരെ​ റമദാനിൽ പ്രവേശിപ്പിക്കും​. അതോടെ മൂന്ന്​ ലക്ഷം പേർക്ക്​ കൂടി നമസ്കരിക്കാൻ സൗകര്യമുണ്ടാകും. വികസന നടപടികൾ മുഴുവൻ പൂർത്തിയാകുന്നതോടെ 20 ലക്ഷത്തിലധികം പേർക്ക്​ ഹറമിൽ നമസ്​കരിക്കാൻ കഴിയും. സ്​ത്രീകളുടെ കാര്യങ്ങൾക്കായി പ്രത്യേക വകുപ്പ്​ തന്നെ പ്രവർത്തിക്കുന്നുണ്ട്​. വിഷൻ 2030 ലക്ഷ്യമിട്ട്​ സ്​ത്രീകളുടെ തൊഴിൽ മേഖലയും വികസിപ്പിക്കുന്നുണ്ടെന്ന​​ും ഇരുഹറം കാര്യാലയ മേധാവി പറഞ്ഞു.