സൗദിയിലും നീറ്റ്​ പരീക്ഷാ കേന്ദ്രം: അധികൃതരെ അഭിനന്ദിച്ച് ഡോ. സിദ്ദീഖ്​ അഹമ്മദ്​

ദമ്മാം: സൗദിയുടെ ചരിത്രത്തിൽ ആദ്യമായി ഇന്ത്യൻ വിദ്യാർഥികൾക്ക്​ മെഡിക്കൽ പ്രവേശനത്തിനുള്ള നീറ്റ്​ (നാഷനൽ എലിജിബിലിറ്റി എൻട്രൻസ്​ ടെസ്​റ്റ്) പരീക്ഷാ കേന്ദ്രം അനുവദിച്ചതിൽ അധികൃതർക്ക് നന്ദിയും അഭിനന്ദനവും അർപ്പിച്ച് പ്രവാസി സമ്മാൻ പുരസ്​കാര ജേതാവും വ്യവസായിയുമായ ഡോ. സിദ്ദീഖ്​ അഹമ്മദ്. റിയാദിലെ കേന്ദ്രത്തിൽ കുട്ടികൾക്ക് പരീക്ഷ എഴുതാൻ സാധിക്കുന്നത്​ എക്കാലത്തേയും മികച്ച ചരിത്രമായി രേഖപ്പെടുത്തുമെന്ന് അദ്ദേഹം​ പറഞ്ഞു.

സൗദിയിൽ നീറ്റ്​ പരീക്ഷാ കേന്ദ്രം അനുവദിപ്പിക്കുന്നതിന്​ അധികൃതരുടെ മുന്നിൽ ശക്തമായ സമ്മർദം ചെലുത്താനായ ചാരിതാർഥ്യത്തിലാണ് അദ്ദേഹം. കഴിഞ്ഞ വർഷം ഇത്​ സാധ്യമാക്കാൻ ഏറെ ശ്രമിച്ചെങ്കിലും സാ​ങ്കേതിക വിഷയങ്ങളിൽ കുടുങ്ങി സാധ്യമാകാതെ വരികയായിരുന്നു. എങ്കിലും ഇത്തവണയെങ്കിലും ഇത്​ സാധ്യമാക്കിയ അധികൃതരെ അഭിനന്ദിക്കുന്നതായും അദ്ദേഹം പറഞ്ഞു.

ഇന്ത്യൻ അംബാസഡറെ ബന്ധപ്പെട്ട്​ ഇക്കാര്യത്തിൽ അടിയന്തര ഇടപെടൽ നടത്താൻ അഭ്യർഥിച്ചിരുന്നു. ഇത്തണ റിയാദിൽ മാത്രമാണ്​ സെൻറർ അനുവദിക്കപ്പെട്ടിട്ടുള്ളത്​. വരും വർഷങ്ങളിൽ സൗദിയുടെ മറ്റ്​ ഭാഗങ്ങളിലും സെൻറർ അനുവദിക്കുമെന്നാണ്​ പ്രതീക്ഷയെന്നും അതിനായി ശ്രമം തുടരുമെന്നും സിദ്ദീഖ്​ പറഞ്ഞു. 224 ആൺകുട്ടികളും 77 പെൺകുട്ടികളും ഉൾപ്പടെ 301 പേരാണ്​ നീറ്റ്​ പരീക്ഷക്കായി ഇത്തവണ രജിസ്റ്റർ ചെയ്​തിട്ടുള്ളത്​. നാട്ടിലേക്കുള്ള യാത്രാസംവിധാനങ്ങൾ തുറന്നതോടെ നിരവധി പേർ പരീക്ഷയെഴുതാനായി നാട്ടിലേക്കും പോയിട്ടുണ്ട്​.

സൗദിയിൽ വർഷംതോറും സയൻസ്​ വിഭാഗത്തിൽ പ്ലസ്​ടു പരീക്ഷ എഴുതുന്നത്​ 1,200 ഓളം കുട്ടികളാണ്​. ഇവരിൽ ഭൂരിഭാഗവും എൻട്രൻസിനെ ആശ്രയിക്കുന്നവരാണ്​. മികച്ച വിജയം നേടുന്ന വിദ്യാർഥികളാണ്​ സൗദിയിലെ സ്​കുളുകളിൽ ഉള്ളത്​. ജി.സി.സിയിലെ മറ്റ്​ രാജ്യങ്ങളിൽ നീറ്റ്​ കേന്ദ്രം അനുവദിച്ച അധികൃതർ സൗദിയിലും ഇത്​ സാധ്യമാക്കിയത്​ ഇവിടുത്തെ ഉന്നത വിദ്യാഭ്യാസ മേഖലയുടെ വലിയ കുതിപ്പിന്​ വഴിയൊരുക്കും എന്നാണ്​ പ്രതീക്ഷിക്കപ്പെടുന്നത്​. സൗദിയിൽ നിന്ന്​ ഔദ്യോഗിക ജീവിതം കഴിഞ്ഞ്​ മടങ്ങിയ മുൻ അംബാസഡർ ഡോ. ഔസാഫ്​ സഈദ്​ ഈ വഷിയത്തിൽ നടത്തിയ ആത്​മാർഥമായ ഇടപെടലുകളെയും അദ്ദേഹം അഭിനന്ദിച്ചു.

ഇന്ത്യൻ വിദ്യാഭ്യാസ മന്ത്രിയുടെ ശ്രദ്ധയിൽ ഈ വിഷയമെത്തിക്കുകയും സൗദി അധികൃതരുമായി അനുമതിക്കുള്ള ചർച്ച നടത്തുകയും ചെയ്യുന്നതിൽ അദ്ദേഹം വിജയിച്ചതായും സിദ്ദീഖ്​ അഹമ്മദ്​ പറഞ്ഞു. സൗദിയിലെ വിവിധ സംഘടനകളും രക്ഷാകർതൃ സമിതിയുമൊക്കെ ഈ വിഷയവുമായി ബന്ധപ്പെട്ട്​ ശ്രദ്ധേയമായ ഇടപെടലുകൾ നടത്തിയിരുന്നു. പ്രവാസികളുടെ കൂട്ടായ വിജയം കൂടിയാണ്​ ഇതെന്നും അദ്ദേഹം പറഞ്ഞു. ഞായറാഴ്​ച റിയാദ്​ ഇൻർനാഷനൽ സ്​കൂൾ കേന്ദ്രത്തിൽ കുട്ടികൾ നീറ്റ്​ പരീക്ഷ പൂർത്തിയാക്കുമ്പോൾ സൗദിയുടെ പ്രവാസ ചരിത്രത്തിലും അത്​ എഴുതിച്ചേർക്കപ്പെടും എന്നും അദ്ദേഹം കൂട്ടിച്ചേർത്തു.