കരുനാഗപ്പള്ളി സ്വദേശി റിയാദിൽ ഉറുമ്പ്​ കടിയേറ്റ്​ മരിച്ചു

റിയാദ്: കറുത്ത വലിയ ഉറുമ്പി​​െൻറ കടിയേറ്റ്​ മലയാളി റിയാദിൽ മരിച്ചു. റിയാദ്​ ബഗ്ലഫിൽ താമസിക്കുന്ന കൊല്ലം കരുനാഗപ്പള്ളി​ സ്വദേശി എം. നിസാമുദ്ദീനാണ് (45)  ബുധനാഴ്​ച പുലർച്ചെ നാലോടെ റിയാദ്​ ഖുറൈസ്​ റോഡിലെ സുലൈമാൻ അൽഹബീബ് ആശുപത്രിയിൽ മരിച്ചത്. കുടുംബസമേതം ബഗ്ലഫിൽ താമസിക്കുന്ന നിസാമുദ്ദീന്​  രാത്രിയിൽ നമസ്​കാരത്തിനിടെ ഫ്ലാറ്റിൽ നിന്നാണ്​ ഉറുമ്പ്​ കടിയേറ്റത്​. അലർജിയുടെ പ്രശ്​നം കൂടിയുള്ളതിനാൽ ഉറുമ്പ്​ കടിയേറ്റ ഉടൻ ശ്വാസം മുട്ടുണ്ടാവുകയും  കുഴഞ്ഞുവീഴുകയുമായിരുന്നു. കൂടെ താമസിക്കുന്ന ഭാര്യാസഹോദരൻ നസീം ഉടൻ ആശുപത്രിയിലെത്തിക്കുകയായിരുന്നു.​

ചികിത്സക്കിടെ ഹൃദയാഘാതവുമുണ്ടായി മരണം സംഭവിച്ചു. 24 വർഷമായി റിയാദിലുള്ള നിസാമുദ്ദീൻ ബഗ്ലഫിൽ ഒരു മിഠായി കമ്പനിയിൽ ജീവനക്കാരനാണ്​​. പരതേനായ മുഹമ്മദ് കുഞ്ഞ് ^ ഫാത്വിമാബി ദമ്പതികളുടെ  മകനാണ്. ഭാര്യ: റസീന. മക്കൾ: റിയാദ്​ ഇൻറർനാഷനൽ ഇന്ത്യൻ സ്കൂൾ വിദ്യാർഥികളായ മുഹമ്മദ് അമീൻ (10ാം ക്ലാസ്), ആദിൽ അദ്നാൻ (നാലാം ക്ലാസ്).  സഹോദരങ്ങൾ: ലത്വീഫ്​, മുസ്​തഫ, സുലൈഖ, റൈഹാനത്ത്​, താഹിറ, ഷംല. മരണാനന്തര നിയമനടപടികൾ പൂർത്തീകരിക്കാൻ സാമൂഹികപ്രവർത്തകൻ ശിഹാബ്  കൊട്ടുകാടും പ്രവാസി സാംസ്​കാരിക വേദി ​പ്രവർത്തകരും​ രംഗത്തുണ്ട്​.