ഉനൈസ ഇൗത്തപ്പഴ മേള തുടങ്ങി

ബുറൈദ: പ്രശസ്​തമായ ഉനൈസ ഇൗത്തപ്പഴ മേളക്ക്​ തുടക്കമായി. തുടർച്ചയായ 14ാം വർഷമാണിത്​. അൽഖസീം പ്രവിശ്യയിലെ ഉനൈസ പട്ടണത്തിൽ നഗരസഭയും ചേമ്പർ ഒാഫ്​ കോമേഴ്​സും ചേർന്ന്​​​ സംഘടിപ്പിക്കുന്ന മേള 36 ദിവസം നീണ്ടുനിൽക്കും. വ്യാഴാഴ്​ച ‘മദീനത്തുൽ തുമൂറി’ൽ ഒരുക്കിയ ചടങ്ങിൽ ഉനൈസ ഗവർണർ അബ്​ദുറഹ്​മാൻ ബിൻ ഇബ്രാഹിം അൽസലീം ഉദ്​ഘാടനം ചെയ്​തു. ചേമ്പർ പ്രസിഡൻറ്​ മുഹമ്മദ്​ അൽമൂസ, നഗരസഭ മേയർ അബ്​ദുൽ അസീസ്​ അബ്​ദുൽ ബസാം, ജനറൽ സൂപ്പർവൈസർ നിസാർ അൽഹർഖാൻ എന്നിവരും ചടങ്ങിൽ പ​െങ്കടുത്തു. ഇൗത്തപ്പഴങ്ങളുടെയും ഇതുകൊണ്ടുള്ള ഉൽപന്നങ്ങളുടെയും വൈവിധ്യം മേളയിലെ ആകർഷണമാണ്​​.

പ്രദർശനവും വിൽപനയുമാണ്​ മേളയിൽ പ്രധാനമായും നടക്കുന്നത്​. ലേലം വിളിച്ച്​ വാങ്ങാൻ സൗദിയുടെ വിവിധ ഭാഗങ്ങളിൽ നിന്നും മറ്റ്​ ജി.സി.സി രാജ്യങ്ങളിൽ നിന്നും ഇൗത്തപ്പഴ പ്രേമികൾ എത്തും. അൽഖസീം ഇൗത്തപ്പഴം ലോകതലത്തിൽ തന്നെ ശ്രദ്ധിക്കപ്പെട്ടിട്ടുള്ളതാണ്​. ഉദ്​പാദകരും വിതരണക്കാരും ഇടനിലക്കാരും ഉപഭോക്താക്കളുമായി ലക്ഷക്കണക്കിനാളുകളാണ്​ മുൻവർഷങ്ങളിൽ മേള സന്ദർശിച്ചിട്ടുള്ളത്​. ഇത്തവണയും പതിവ്​ തെറ്റില്ലെന്നും കൂടുതലാളുകൾ വരുമെന്നും സംഘാടകർ പറയുന്നു. മേളയോട്​ അനുബന്ധിച്ച്​ വിവിധ സാംസ്​കാരിക, വിനോദ, ബോധവൽകരണ പരിപാടികളും ഒരുക്കിയതായി സംഘാടക സമിതി മേധാവി ഡോ. മൻസൂർ അൽമു​ശൈത്വി അറിയിച്ചു.