നഴ്സുമാർക്കുള്ള 'ഡെയ്​സി' അവാർഡുകൾ വിതരണം ചെയ്തു

ദമ്മാം: സൗദിയുടെ കിഴക്കൻ പ്രവിശ്യയിൽനിന്ന് 'ഡെയ്​സി' അവാർഡുകൾക്ക്​ അർഹത നേടിയ നഴ്സുമാർക്ക് അവാർഡുകൾ വിതരണം ചെയ്തു. ആതുര ശുശ്രൂഷാരംഗത്ത് മികച്ച സേവനം കാഴ്ചവെക്കുന്ന നഴ്​സുമാർക്കുള്ള അന്താരാഷ്ട്ര അംഗീകാരമാണ് 'ഡെയ്​സി' അവാർഡ്. ദമ്മാമിലെ വിവിധ ആശുപത്രികളിൽ സേവനം ചെയ്യുന്ന നഴ്സുമാർക്കുള്ള അവാർഡ്​ വിതണ പരിപാടി ദമ്മാമിലെ ദാറസ്സിഹ മെഡിക്കൽ സെന്‍ററിന്‍റെ ആഭിമുഖ്യത്തിലാണ്​ സംഘടിപ്പിച്ചത്​.

അൽ-ഗുസൈബി ഹോട്ടൽ ഓഡിറ്റോറിയത്തിൽ നടന്ന ചടങ്ങിൽ സൗദി ആരോഗ്യ വകുപ്പിൽനിന്നുള്ളവരടക്കം നിരവധി പ്രമുഖർ പ​​​​ങ്കെടുത്തു. മന്ത്രാലയ​ പ്രതിനിധി പബ്ലിക്​ ഹെൽത്ത്​ നഴ്​സിങ്​ സീനിയർ സ്​പെഷ്യലിസ്​റ്റ്​ ഡോ. മുനീഫ്​ അൽ-ദജാനി, കിങ് ഫഹദ്​ സ്​പെഷ്യലിസ്റ്റ്​ ആശുപത്രി ഈസ്​റ്റേൺ ഹെൽത്ത്​ ക്ലസ്റ്ററിന്‍റെ ചീഫ്​ ഓഫ്​ നഴ്​സിങ്​ ഡോ. ശരീഫ്​ ഉമർ, നഴ്​സിങ്​ അഡ്​മിനിസ്​ട്രേഷൻ ആക്ടിങ്​ എക്സിക്യുട്ടീവ്​ ഡയറക്ടർ റാമി അൽ-സലാഖ്​, ദമ്മാം മെഡിക്കൽ കോംപ്ലക്സ് പ്രതിനിധി ഡോ. അഹ്​മാരി, നഴ്സിങ്​ അഫയേഴ്​സ്​ എക്സിക്യൂട്ടീവ്​ ഡയറക്ടർ സോഹ സഹ്​വാൻ, ഖത്വീഫ്​ സെന്‍ട്രൽ ആശുപത്രി പ്രതിനിധി ഡോ. റിയാദ്​ അൽ-മൂസ, നഴ്​സിങ്​ അഫയേഴ്​സ്​ എക്സിക്യുട്ടീവ്​ ഡയറക്ടർ അമൽ അൽ-ഹസാവി, ദാറസ്സിഹ മെഡിക്കൽ സെന്‍റർ മെഡിക്കൽ ഓഫീസർ ഡോ. ഹാദി അവ്വാമി, ഇറാം ഗ്രൂപ്​ വൈസ്​ പ്രസിഡന്‍റ്​ ഫഹദ്​ അൽ-തുവൈജിരി, ഖാലിദ്​ അൽ-തുവൈജിരി, ഇറാം ഗ്രൂപ്​ ഡയറക്ടർ സഫ്​റാസ്​ മുഹമ്മദ്​ തുടങ്ങിയവർ പ്രധാന അതിഥികളായി പ​​ങ്കെടുത്തു.

ആശുപത്രികളിൽ എത്തുന്ന രോഗികൾ, ബന്ധുക്കൾ, ഡോക്ടർമാർ, സഹജീവനക്കാർ എന്നിവരിൽനിന്ന്​ ശേഖരിക്കുന്ന വിവരങ്ങളുടെ അടിസ്ഥാനത്തിലാണ്​ ഡെയ്​സി അവാർഡ്​ ജേതാക്കളെ തെരഞ്ഞെടുക്കുന്നത്​. 1999-ൽ അമേരിക്കയിൽ ആരംഭിച്ച ഡെയ്​സി അവാർഡ്​ ഇന്ന്​ ലോകത്തിലെ മിക്ക രാജ്യങ്ങളിലും നൽകപ്പെടുന്നുണ്ട്​. നഴ്​സിങ്​ മേഖലയിലെ ലോകോത്തര അംഗീകരമായാണ്​ ഇതിനെ കണക്കാക്കുന്നത്​.

ചടങ്ങിൽ യഥാക്രമം ദാറസ്സിഹ മെഡിക്കൽ ​സെന്‍റർ, ദമ്മാം മെഡിക്കൽ കോംപ്ലക്സ്​, കിങ് ഫഹദ്​ സ്​പെഷ്യലിസ്റ്റ് ​ആശുപത്രി, ഖത്വീഫ്​ സെട്രൽ ആശുപത്രി എന്നിവിടങ്ങളിൽനിന്നുള്ള നഴ്​സുമാർ അവാർഡുകൾ ഏറ്റുവാങ്ങി. സർട്ടിഫിക്കറ്റും ഡെയ്​സി പതക്കവുമാണ്​ അവാർഡ്​. അവാർഡിനായി തെര​ഞ്ഞെടുക്കപ്പെടുന്നവരിൽനിന്നും കൂടുതൽ മികവുള്ള രണ്ടുപേർക്ക്​ അതത്​​ സ്ഥാപനങ്ങളും പ്രത്യേകം അവാർഡുകൾ നൽകി.

തങ്ങളുടെ മുന്നിലെത്തുന്ന രോഗികൾക്ക്​ മരുന്നും പരിചരണവും നൽകുന്നതിനുമപ്പുറത്ത്​ നൽകുന്ന മാനസിക കരുത്തും അടിയന്തര സാഹചര്യങ്ങളിൽ നഴ്​സുമാരുടെ അസാധാരണ ഇടപെടലുകളും ആണ്​ പലരേയും അവാർഡിന്​ അർഹമാക്കിയത്​. അവാർഡ്​ സ്വീകരിച്ച് കൊണ്ട് നഴ്​സുമാർ പങ്കുവെച്ച വികാരതീവ്രമായ അനുഭവങ്ങളെ സദസ് നീണ്ട ക​രഘോഷത്തോടെയാണ്​ സ്വീകരിച്ചത്​. ദാറസ്സിഹ ചീഫ്​ നഴ്​സിങ്​ ഓഫിസർ എർളിൻ നവാരോ അവതാരകനായിരുന്നു. ദാറസ്സിഹ ഖിമ്മത്​ സിഹ ഡയറക്​ടർ മുഹമ്മദ്​ അഫ്​നാസ്​ സ്വാഗതവും ബിസിനസ്​ ഡവലപ്മെന്‍റ്​ മാനേജർ സുനിൽ മുഹമ്മദ്​ നന്ദിയും പറഞ്ഞു.