മദീനയിൽ ആറ്​ ജില്ലകളിലെ കർഫ്യൂവിൽ ഇളവ്​

ജിദ്ദ: മദീനയിലെ ആറ്​ ഡിസ്​ട്രിക്​റ്റുകളിൽ ഏർപ്പെടുത്തിയ കർഫ്യൂ പിൻവലിച്ചതായി ആഭ്യന്തര മന്ത്രാലയ വക്​താവ്​ വ്യക്​തമാക്കി. ആരോഗ്യ വകുപ്പുകളുടെ ശിപാർശയെ തുടർന്നാണ്​ ശുറൈബാത്ത്, ബനീദഫർ, ഖുർബാൻ,  അൽജുമുഅ, ഇസ്​കാനിലെ കുറച്ച്​ ഭാഗം, ബനീ ഖുദ്​റ എന്നിവിടങ്ങളിലെ കർഫ്യു ശനിയാഴ്ച മുതൽ ഇളവ്  വരുത്തിയത്.

ഇവിടെങ്ങളിൽ ആരോഗ്യ സുരക്ഷാ മുൻകരുതലുകൾ പാലിച്ച് രാവിലെ ഒമ്പത്​ മുതൽ വൈകുന്നേരം അഞ്ച്​ വരെ ആളുകൾക്ക്​ പുറത്തിറങ്ങാം. നേരത്തെ കർഫ്യുവിൽ നിന്ന്​ ഇളവു നൽകിയ സ്​ഥാപനങ്ങൾക്ക്​ പ്രവർത്തനം തുടരാം. കോവിഡ്​ വ്യാപനം തടഞ്ഞ്​ പൊതുജനാരോഗ്യം സംരക്ഷിക്കാൻ നടത്തുന്ന നടപടികളുടെ  ഭാഗമാണിതെന്ന്​ ആഭ്യന്തര മന്ത്രാലയം വ്യക്​തമാക്കി.

തീരുമാനം പുനപരിശോധനക്ക്​ വിധേയായി കൊണ്ടിരിക്കും.  മുഴുവനാളുകളും ആരോഗ്യ സുരക്ഷ നിബന്ധനകൾ പാലിക്കണമെന്നും ആഭ്യന്തര മന്ത്രാലയം വ്യക്​തമാക്കി.