സൗദിയിൽ കർഫ്യു തീരുമാനം പൊതുജനങ്ങളു​ടെ കൈകളിലാണ്​​ -ആഭ്യന്തര മന്ത്രാലയം

ജിദ്ദ: കോവിഡ്​ കേസുകൾ വീണ്ടും ഉയരുന്ന സാഹചര്യത്തിൽ സൗദിയിൽ കർഫ്യു വീണ്ടും പ്രഖ്യാപിക്കേണ്ടി വരുമോ എന്നത്​​ ജനങ്ങളുടെ പെരുമാറ്റം അനുസരിച്ചിരിക്കുമെന്ന്​ ആഭ്യന്തര മന്ത്രാലയം. കോവിഡ്​ മുൻകരുതൽ ചട്ടങ്ങൾ ലംഘിച്ചാൽ സ്ഥിതി വഷളാവും. കർഫ്യു തീരുമാനം പൊതുജനങ്ങളു​ടെ കൈകളിലാണെന്ന്​ പറയുന്നത്​ അതുകൊണ്ടാണ്​. ബന്ധപ്പെട്ട വകുപ്പുകൾ​ കോവിഡ്​​ സ്ഥിതിഗതികൾ സസൂക്ഷ്​​മം നിരീക്ഷിച്ച്​ വരികയാണ്​​.

ആവശ്യം വന്നാൽ കർഫ്യു നടപ്പാക്കുമെന്നും മന്ത്രാലയ സുരക്ഷാ വക്താവ്​ കേണൽ തലാൽ അൽശൽഹൂബ്​ പറഞ്ഞു. ഒരാഴ്​ചക്കുള്ളിൽ 31,868 കോവിഡ്​ മുൻകരുതൽ ചട്ടലംഘനങ്ങളാണ്​ റിപ്പോർട്ട്​ ചെയ്​തതെന്നും വാർത്തസമ്മേളനത്തിൽ അദ്ദേഹം വ്യക്തമാക്കി. ​കോവിഡ്​ മുൻകരുതൽ നിയമലംഘനങ്ങൾ 72 ശതമാനമായി ഉയർന്നിട്ടുണ്ട്​.

പൊതുജനാരോഗ്യം സംരക്ഷിക്കാനും കോവിഡ്​ വ്യാപനം തടയാനും നിരവധി മുൻകരുതൽ നടപടി സ്വീകരിച്ചിട്ടുണ്ട്​. കോവിഡുമായി ബന്ധപ്പെട്ട്​ പരിഭ്രാന്തിയുണ്ടാക്കുന്ന അഭ്യൂഹങ്ങളും തെറ്റായ വിവരങ്ങളും പ്രചരിപ്പിക്കുന്നതിന്​ എതിരെയും അദ്ദേഹം മുന്നറിയിപ്പ്​ നൽകി. നടപടിക്രമങ്ങൾ തുടർച്ചയായി വിലയിരുത്താൻ ബന്ധപ്പെട്ട വകുപ്പുകൾ പ്രവർത്തിക്കുന്നുണ്ടെന്നും അദ്ദേഹം കൂട്ടിച്ചേർത്തു.