സൗദി ഡ്രൈവിങ് സ്‌കൂളുകളിൽ തിരക്കേറി

റിയാദ്: കോവിഡ് കാരണം മാസങ്ങളോളം അടഞ്ഞുകിടന്ന സൗദി അറേബ്യയിലെ ഡ്രൈവിങ് സ്‌കൂളുകൾ തുറന്നപ്പോൾ ലൈസൻസിനായി അപേക്ഷിക്കുന്നവരുടെ തിരക്ക് വർധിച്ചു. 10 ദിവസം തിയറി, പ്രാക്​ടിക്കൽ ക്ലാസുകളിൽ പ​െങ്കടുക്കണമെന്ന കാരണത്താൽ കോവിഡിനുമുമ്പ്​ അപേക്ഷകർ കുറവായിരുന്നു​. കോവിഡിനുശേഷം പുനരാരംഭിച്ചപ്പോൾ അത് അഞ്ചു ദിവസമായി കുറച്ചത്​ അപേക്ഷകർക്ക്​ അനുഗ്രഹമായി. മുമ്പ്​ അപേക്ഷിച്ചാൽ മാസങ്ങൾ കാത്തിരുന്നാൽ മാത്രമാണ്​ ക്ലാസിനുള്ള തീയതി ലഭിക്കുക. എന്നാൽ, ഇപ്പോൾ 20 ദിവസത്തിനുള്ളിൽ തീയതി ലഭിക്കും. പൂരിപ്പിച്ച അപേക്ഷഫോറത്തിൽ ഫോട്ടോ പതിപ്പിച്ചു രക്തഗ്രൂപ് നിർണയവും കാഴ്ച പരിശോധനയും നടത്തി അതി​െൻറ റിസൽട്ട്​ സഹിതമാണ്​ ലൈസൻസിന് അപേക്ഷിക്കേണ്ടത്.

പുതിയ അപേക്ഷകരെ മൂന്നു വിഭാഗങ്ങളിലായി തരംതിരിച്ചാണ്​​ നിലവിൽ ക്ലാസുകൾ നടക്കുന്നത്. വലിയ ചരക്കുവാഹനങ്ങൾ, ചെറിയ വാഹനങ്ങൾ, പൊതുഗതാഗത വാഹനങ്ങൾ (ടാക്സി). മൂന്നു സമയങ്ങളിലായാണ് ക്ലാസുകൾ സജ്ജീകരിച്ചിരിക്കുന്നത്. ഞായറാഴ്ച തുടങ്ങി വ്യാഴാഴ്ച അവസാനിക്കുന്ന രൂപത്തിലാണ് അഞ്ചു ദിവസത്തെ ക്ലാസുകളുടെ ക്രമീകരണം. ഈ ദിവസങ്ങളിൽ ഗതാഗത നിയമങ്ങളെക്കുറിച്ച്​ ക്ലാസും ഡ്രൈവിങ്​ പരിശീലനവും ലഭിക്കും. പരിശീലനം പൂർത്തിയാക്കുന്നവർക്ക് ഒരാഴ്ച കഴിഞ്ഞ്​ അവസാന ടെസ്​റ്റുകൾക്കുള്ള തീയതി ലഭിക്കും. ഈ ദിവസം ആദ്യം ലേണേഴ്സ് ടെസ്​റ്റും അതിൽ പാസാകുന്നവർക്ക് ഡ്രൈവിങ്​ ടെസ്​റ്റും നടത്തി പാസായാൽ അന്നുതന്നെ ലൈസൻസ് ലഭിക്കും. അഞ്ചുമുതൽ 10 വരെ വർഷം കാലാവധിയുള്ള ലൈസൻസുകൾക്ക് അപേക്ഷിക്കാം.

റിയാദിൽ പ്രധാനമായും പുരുഷന്മാർക്ക് രണ്ട്​ ഡ്രൈവിങ്​ സ്‌കൂളുകളാണ് നിലവിലുള്ളത്. വരുംമാസങ്ങളിൽ ലൈസൻസുകൾക്ക്​ അപേക്ഷിക്കാൻ കൂടുതൽ നിയന്ത്രണം വരാൻ സാധ്യതയുണ്ടെന്നതും തിരക്ക് വർധിക്കാൻ കാരണമായിട്ടുണ്ട്.