റിയാദിൽ 17,000 വ്യാജ ബ്രാൻഡഡ്​ സ്​പോർട്​സ്​ വസ്​ത്രങ്ങൾ പിടികൂടി

റിയാദ്​: റിയാദിൽ 17000 വ്യാജ ബ്രാൻഡഡ്​  സ്​പോർട്​സ്​ വസ്​ത്രങ്ങൾ പിടികൂടി. ‘നൈക്’​ ഉൾ​െപടെ ലോകോത്തര ബ്രാൻഡുകളുടെ വ്യാജമു​ദ്രയടിച്ച വസ്​ത്രങ്ങളുടെ വൻശേഖരമാണ്​ പിടികൂടിയത്​. ഒറിജിനൽ ആണെന്ന വ്യാജേന വൻവിലക്ക്​ വിപണിയിൽ വിൽക്കുന്ന സാധനങ്ങളാണിതെന്ന്​ അന്വേഷണത്തിൽ കണ്ടെത്തിയിട്ടുണ്ട്​.  റിയാദ്​ സിറ്റിയിലെ അൽഹയാർ റോഡിലെ  വെയർ ഹൗസുകളിൽ വാണിജ്യ മന്ത്രാലയം പൊലീസി​​െൻറ സഹായത്തേടെ പരിശോധന നടത്തുകയായിരുന്നു. 

പിടിച്ചെടുത്ത വസ്​​ത്രങ്ങൾ  തുർക്കിയിൽ നിന്നാണ്​ ഇറക്കുമതി ചെയ്തതെന്ന്​ കണ്ടെത്തി. ലോക പ്രശസ്​ത വ്യാപാരമുദ്രകൾ വ്യാജമായി പതിച്ചാണ്​ ഇവ വൻ വിലക്ക്​ വിൽക്കുന്നത്​ എന്ന്​ അന്വേഷണത്തിൽ വ്യക്​തമായതായി അധികൃതർ അറിയിച്ചു. വെയർ ഹൗസ്​ അടച്ചുപൂട്ടി സ്​ഥാപന ഉടമയോട്​ ഹാജരാവാൻ അധികൃതർ നോട്ടീസ്​ നൽകിയിട്ടുണ്ട്​. ഇത്തരം വ്യാജ ഉൽപന്നങ്ങൾ വിൽക്കാൻ പാടില്ലെന്ന്​ വാണിജ്യ നിക്ഷേപ മ​ന്ത്രാലയം മുന്നറിയിപ്പ്​ നൽകി.

നിയമമനുസരിച്ച്​ വ്യാജവ്യാപാരമുദ്ര രേഖപ്പെടുത്തി സാധനങ്ങൾ വിറ്റാൽ മൂന്ന്​ വർഷം വരെ തടവ്​, ഒരു ദശലക്ഷം റിയാൽ വരെ പിഴ, രണ്ട്​ പ്രാദേശിക പത്രങ്ങളിൽ വ്യാജഉൽപന്നം വിൽക്കുന്ന സ്​ഥാപനത്തിനെതിരെ പരസ്യം  എന്നിവയാണ്​ ശിക്ഷ. വിദേശികളാണ്​ കുറ്റക്കാരെങ്കിൽ അവരെ നാടുകടത്തുകയും ചെയ്യും. ഇത്തരം വ്യാജവിൽപന സംബന്ധിച്ച്​ വിവരം അറിയുന്നവർ 1900 നമ്പറിൽ അറിയിക്കണമെന്ന്​ വാണിജ്യമന്ത്രാലയം അറിയിച്ചു.