ഉംലജ്​ കടലിൽ മയക്കുമരുന്നുവേട്ട; ഏഴുലക്ഷം ഗുളികകൾ പിടിച്ചെടുത്തു

റിയാദ്​: ഏഴുലക്ഷം മയക്കുമരുന്ന്​ ഗുളികകൾ തീരരക്ഷാസേന പിടികൂടി. തബൂക്ക്​ പ്രവിശ്യയിലെ ഉംലജിന്​ അടുത്താണ്​ സംഭവം. ആഴക്കടലിൽ പവിഴപ്പുറ്റുകളിൽ ബന്ധിപ്പിച്ചിട്ടിരുന്ന പൈപ്പുകൾക്കുള്ളിൽ നിന്നാണ്​ ആംഫിറ്റമിൻ ഗുളികകൾ കണ്ടെടുത്തത്​.ജലോപരിതലത്തിന്​ തൊട്ടുതാഴെ പൈപ്പുകൾ കിടക്കുന്നത്​ കണ്ടാണ്​നാവിക പ​േ​​ട്രാളിങ്​ സംഘത്തിന്​  സംശയം തോന്നിയതെന്ന്​ അതിർത്തിരക്ഷാസേന വക്​താവ്​ കേണൽ സാഹിർ ബിൻ മുഹമ്മദ്​ അൽ ഹാർബി പറഞ്ഞു. ഉംലജ്​ പരിധിയിലെ ദ്വീപ്​ മേഖലയിലായിരുന്നു ഇത്​. പരിശോധനയിൽ പവിഴപ്പുറ്റുകളിൽ കെട്ടിയിട്ടിരിക്കുകയാണെന്ന്​ മനസിലായി. ഉടൻ പട്രോൾ സംഘം പ്രദേശം വളയുകയും ഡൈവർമാരെ കൊണ്ടുവന്ന്​ പരിശോധിപ്പിക്കുകയും ചെയ്​തു. 

ആഴക്കടലിലേക്ക്​ ഡൈവർമാർ മുങ്ങിപ്പോയാണ്​ പൈപ്പുകൾ മുകളിലെത്തിച്ചത്​. പൈപ്പുകൾക്കുള്ളിൽ 372 പ്ലാസ്​റ്റിക്​ ബാഗുകളിലായി ഏഴുലക്ഷത്തോളം ഗുളികകളാണ്​ ഉണ്ടായിരുന്നത്​. വിവിധ രീതികളിൽ മയക്കുമരുന്ന്​ കടത്താൻ ശ്രമം നടക്കുന്നുണ്ടെന്നും ഏതുനീക്കത്തെയും ജാഗ്രതയോടെ നേരിടുമെന്നും കേണൽ അൽ ഹാർബി കൂട്ടിച്ചേർത്തു.