കോവിഡ്; റിയാദിൽ വീണ്ടും പുതിയ രോഗികൾ വർധിക്കുന്നു

ജിദ്ദ: സൗദിയിൽ ഇന്ന് 1,142 പുതിയ കോവിഡ് രോഗികളും 1,089 രോഗമുക്തിയും റിപ്പോർട്ട് ചെയ്തു. രാജ്യത്ത് ആകെ റിപ്പോർട്ട് ചെയ്ത കേസുകളുടെ എണ്ണം 4,39,847 ഉം ആകെ രോഗമുക്തരുടെ എണ്ണം 4,23,795 ഉം ആയി. പുതുതായി 13 മരണങ്ങളും റിപ്പോർട്ട് ചെയ്തു. ഇതുവരെ ആകെ മരിച്ചവരുടെ എണ്ണം 7,237 ആയി. വിവിധ ആശുപത്രികളിലും മറ്റുമായി നിലവിൽ ചികിത്സയിലുള്ള രോഗികളുടെ എണ്ണം 8,815 ആണ്. ഇവരിൽ 1,329 പേരുടെ നില ഗുരുതരമാണ്. ചികിത്സയിൽ കഴിയുന്ന ബാക്കിയുള്ളവരുടെ ആരോഗ്യനില തൃപ്തികരമാണ്.

രാജ്യത്തെ കോവിഡ് മുക്തി നിരക്ക് 96.46 ശതമാനവും മരണനിരക്ക് 1.65 ശതമാനവുമായി തുടരുന്നു. റിയാദ് പ്രവിശ്യയിൽ വീണ്ടും പുതിയ രോഗികളുടെ എണ്ണം വർധിക്കുന്നുണ്ട്. വിവിധ പ്രവിശ്യകളിൽ പുതുതായി റിപ്പോർട്ട് ചെയ്ത രോഗികളുടെ എണ്ണം: റിയാദ് 336, മക്ക 250, കിഴക്കൻ പ്രവിശ്യ 158, മദീന 97, അസീർ 60, ജീസാൻ 59, അൽ ഖസീം 52, തബൂക്ക് 37, ഹാഇൽ 32, നജ്റാൻ 25, അൽബാഹ 19, വടക്കൻ തിർത്തി മേഖല 11, അൽ ജൗഫ് 6.