കോവിഡ്​ വ്യാപനത്തിന്​ ശമനം വന്നാൽ പള്ളികൾ തുറക്കും: ഇസ്​ലാമികകാര്യ മന്ത്രി

ജിദ്ദ: രാജ്യത്ത്​ കോവിഡ്​ വ്യാപനത്തിന്​ ശമനം വന്നാൽ പള്ളികൾ തുറക്കുമെന്ന്​ സൗദി ഇസ്​ലാമികകാര്യ മന്ത്രി ഡോ. അബ്​ദുല്ലത്തീഫ്​ ബിൻ അബ്​ദുൽ അസീസ്​ ആലുശൈഖ്​. ഗവൺമ​​െൻറി​​​െൻറ നിർദേശങ്ങൾക്കും പണ്ഡിതന്മാരുടെ അഭിപ്രായങ്ങൾക്കും അനുസരിച്ചായിരിക്കും​ പള്ളികളിൽ നമസ്​കാരങ്ങൾക്ക്​ ഏർപ്പെടുത്തിയ താൽകാലിക വിലക്ക്​ നീക്കം ചെയ്യുകയെന്നും​ അദ്ദേഹം പറഞ്ഞു. 

കോവിഡ്​ ഭീഷണിയുടെ പശ്ചാത്തലത്തിലാണ്​ പള്ളികളിൽ ജമാഅത്ത്​, ജുമുഅ നമസ്​കാരങ്ങൾക്ക്​ താൽകാലിക വിലക്ക്​  ഏർപ്പെടുത്തിയത്​. വിലക്ക്​ എത്രയും വേഗം നീക്കണമെന്നാണ്​ നാം ആഗ്രഹിക്കുന്നത്​. പകർച്ചവ്യാധിയുടെ  വ്യാപനശക്​തി കുറയുന്നതോടെ അതുണ്ടാകുമെന്ന്​ തന്നെ പ്രതീക്ഷിക്കുകയും ചെയ്യുന്നു​. ഗവൺ​മ​​െൻറി​​​െൻറ  നിർദേശങ്ങൾക്കും മുതിർന്ന പണ്ഡിതന്മാരുടെ അഭിപ്രായങ്ങൾക്കും പുറമെ ​ആരോഗ്യ വകുപ്പി​​​െൻറ  സ്ഥിതിഗതികളെ കുറിച്ചുള്ള വിലയിരുത്തലുകളും പരിഗണിച്ചേ ഇക്കാര്യത്തിൽ ഒരു തീരുമാനമെടുക്കൂ​.  

ജനങ്ങളുടെ ആരോഗ്യ സുരക്ഷക്ക്​ വേണ്ട മുൻകരുതൽ നടപടികൾ പൂർണമായും ഉറപ്പുവരുത്തേണ്ടതുണ്ട്​. ആരോഗ്യ വകുപ്പുകളും പണ്ഡിതന്മാരും കോവിഡിനെ തുടർന്നുണ്ടായ സ്​ഥിതിഗതികൾ മുഴുസമയം  വിലയിരുത്തി കൊണ്ടിരിക്കുന്നുണ്ട്​. ചിലർ സമൂഹ മാധ്യമങ്ങളിൽ ഒരു സുക്ഷ്​​മതയും പുലർത്താതെ, ഉടനെ പള്ളികൾ തുറക്കുമെന്ന്​ പ്രചരിപ്പിക്കുന്നത്​ ശ്രദ്ധയിൽപ്പെട്ടുണ്ട്​. അതെല്ലാം അടിസ്ഥാനരഹിതമായ പ്രചാരണങ്ങളാണ്​. യഥാർഥ ഉറവിടങ്ങളിൽ നിന്നുള്ള വിവരങ്ങൾ മാത്രമേ വിശ്വസിക്കാനും പ്രചരിപ്പിക്കാനും  പാടുള്ളൂ. രാജ്യത്തെ പൗരന്മാരുടെയും വിദേശികളുടെയും ആരോഗ്യ സുരക്ഷ കണക്കിലെടുത്താണ്​ പള്ളികളിൽ നമസ്​കാരത്തിന്​ താൽകാലിക വിലക്ക്​ ഏർപ്പെടുത്തിയതെന്നും ആരോഗ്യ മന്ത്രി പറഞ്ഞു.