സൗദിയിൽ കാൽലക്ഷം കടന്നു രോഗികൾ; നടന്നത്​ മൂന്നര ലക്ഷത്തോളം കോവിഡ്​ ​പരിശോധന

റിയാദ്​: സൗദി അറേബ്യയിൽ കോവിഡ് ബാധിതരുടെ എണ്ണം കാൽലക്ഷം കടന്നു.​ ആകെ 339,775 പരിശോധനകളാണ്​ നടന്നത്​. അതിൽ പോസിറ്റീവ്​ കേസുകളായി  കണ്ടെത്തിയവരുടെ എണ്ണം 25459 ആയി. ശനിയാഴ്​ച 1362 പേരിലാണ്​ കോവിഡ്​ സ്ഥിരീകരിച്ചത്​. 24 മണിക്കൂറിനിടെ​ ഏഴ്​ പേർ മരിച്ചു. ജിദ്ദയിലും മക്കയിലുമായി മരിച്ച  ഏഴുപേരും വിദേശികളാണ്​. 33നും 57നും ഇടയിൽ പ്രായമുള്ളവരാണ്​ മരിച്ചവർ.

പുതിയ രോഗികളിൽ 9 ശതമാനം മാത്രമാണ്​ സ്വദേശികളെന്നും 91 ശതമാനവും  വിദേശികളാണെന്നും ആരോഗ്യമന്ത്രാലയ വക്താവ്​ ഡോ. മുഹമ്മദ്​ അബ്​ദു അൽഅലി വാർത്താസമ്മേളനത്തിൽ പറഞ്ഞു. ആകെ രോഗികളിൽ 11 ശതമാനമാണ്​ സ്​ത്രീകൾ.  ബാക്കി 89 ശതമാനവും പുരുഷന്മാരാണ്​. രോഗികളിൽ മൂന്ന്​ ശതമാനം കുട്ടികളും രണ്ട്​ ശതമാനം കൗമാരക്കാരും 95 ശതമാനം മുതിർന്നവരുമാണ്​.

210 പേരാണ്​ പുതുതായി  സുഖം പ്രാപിച്ചത്​. ഇതോടെ രോഗമുക്തരുടെ എണ്ണം 3765 ആയി ഉയ​ർന്നു. ചികിത്സയിൽ കഴിയുന്ന 21518 ആളുകളിൽ 139 പേർ ഗുരുതരാവസ്ഥയിൽ തീവ്രപരിചരണ  വിഭാഗത്തിലാണ്​. രോഗികളെ കണ്ടെത്താൻ ആരോഗ്യ വകുപ്പ്​ രാജ്യവ്യാപകമായി നടത്തുന്ന ഫീൽഡ്​ സർവേ 16 ദിവസം പിന്നിട്ടു. വീടുകളിലും മറ്റ്​ താമസകേന്ദ്രങ്ങളിലും  ചെന്നുള്ള മെഡിക്കൽ ടീമി​​െൻറ പരിശോധന തുടരുകയാണ്​. മൂന്നുപേർ കൂടി മരിച്ചതോടെ മക്കയിൽ മരണസംഖ്യ 75 ആയി. നാലുപേർ കൂടി മരിച്ച ജിദ്ദയിൽ ആകെ മരണസംഖ്യ 45 ആയി. 

പുതിയ രോഗികൾ:
മദീന​ 249, ജിദ്ദ 245, മക്ക 244, റിയാദ്​ 16-1, ദമ്മാം 126, ഖോബാർ 81, ജുബൈൽ 80, ഹുഫൂഫ്​ 64, ഖമീസ്​ മുശൈത്ത്​ 21, ദറഇയ 19, ബുറൈദ 16, ത്വാഇഫ്​ 13, റാസതനൂറ 9, അൽഖർജ്​ 6, ബേഷ്​ 5, അബ്​ഖൈഖ്​ 4, നാരിയ 3, ബൽജുറഷി 3, ബീഷ 2, ദഹ്​റാൻ 2, അൽമജാരിദ 2, ഖുൻഫുദ 2, അറാർ 1, അൽദർബ്​ 1, മഹായിൽ 1, തുർബ 1, മിദ്​നബ്​ 1.

മരണസംഖ്യ:
മക്ക 75, ജിദ്ദ 45, മദീന 32, റിയാദ്​ 7, ഹുഫൂഫ്​ 4, ദമ്മാം 3, ജുബൈൽ 2, അൽഖോബാർ 2, ജീസാൻ 1, ഖത്വീഫ് 1​, ഖമീസ്​ മുശൈത്ത് 1​, ബുറൈദ 1, അൽബദാഇ 1, തബൂക്ക്​  1.