കോവിഡ്; സൗദിയിൽ ചികിത്സയിലുള്ള രോഗികൾ 12,000 കടന്നു

ജിദ്ദ: സൗദിയിൽ ചികിത്സയിലുള്ള കോവിഡ് രോഗികൾ 12,000 കടന്നു. ദമ്മാം ഉൾപ്പെടുന്ന കിഴക്കൻ പ്രവിശ്യയിലാണ് ഇന്ന് ഏറ്റവും കൂടുതൽ പുതിയ രോഗികൾ റിപ്പോർട്ട് ചെയ്തത്. 360 പേർക്കാണ് ഇവിടെ പുതുതായി രോഗം ബാധിച്ചത്.

രാജ്യത്താകെ ഇന്ന് 1,486 പുതിയ കോവിഡ് രോഗികളും 1,055 രോഗമുക്തിയും റിപ്പോർട്ട് ചെയ്തു. ഇതോടെ സൗദിയിൽ ആകെ കോവിഡ് രോഗികളുടെ എണ്ണം 4,87,592, ഉം ആകെ രോഗമുക്തരുടെ എണ്ണം 4,67,633 ഉം ആയി. 15 മരണങ്ങൾ ഇന്ന് കോവിഡ് മൂലമാണെന്ന് സ്ഥിരീകരിച്ചു. ഇതോടെ ആകെ മരിച്ചവരുടെ എണ്ണം 7,819 ആയി. വിവിധ ആശുപത്രികളിലും മറ്റുമായി കോവിഡ് ചികിത്സയിലുള്ളവരുടെ എണ്ണം 12,140 ആണ്.

ഇവരിൽ 1,406 പേരുടെ നില ഗുരുതരമാണ്. ചികിത്സയിൽ കഴിയുന്ന ബാക്കിയുള്ളവരുടെ ആരോഗ്യസ്ഥിതി തൃപ്തികരമാണ്. രാജ്യത്തെ കോവിഡ് മുക്തി നിരക്ക് 96.90 ശതമാനവും മരണനിരക്ക് 1.60 ശതമാനവുമാണ്. വിവിധ പ്രവിശ്യകളിൽ പുതുതായി റിപ്പോർട്ട് ചെയ്ത രോഗികളുടെ എണ്ണം: കിഴക്കൻ പ്രവിശ്യ 360, മക്ക 317, റിയാദ് 261, അസീർ 196, ജീസാൻ 91, മദീന 67, നജ്റാൻ 36, അൽബാഹ 36, അൽ ഖസീം 35, ഹാഇൽ 32, തബൂക്ക് 28, വടക്കൻ അതിർത്തി മേഖല 19, അൽ ജൗഫ് 8.