അരിയിൽ മായം ചേർത്ത വിദേശിക്ക്​ പിഴയും നാടു കടത്തലും ശിക്ഷ

ഹാഇൽ: അരിയിൽ മായം ചേർത്ത വിദേശിയായ അറബ്​ പൗരന്​ പിഴയും നാടു കടത്തലും ശിക്ഷ. ഹാഇലിൽ മൊത്ത, ചില്ലറ വിൽപന നടത്തി​ വരുന്ന കമ്പനിയുടെ ഫാക്​ടറിയിൽ ജോലി ചെയ്യുന്ന അറബ്​ പൗരനെതിരെയാണ് റിയാദിലെ അപ്പീൽ​ കോടതി വിധി​െയന്ന്​ വാണിജ്യ നിക്ഷേപ മന്ത്രാലയം വ്യക്​തമാക്കി. 
കച്ചവട ചരക്കുകളിൽ മായം ചേർത്തതായും ​​ട്രേഡ്​ മാർക്ക്​ നിയമം ലംഘിച്ചതായും കണ്ടെത്തിയതിനെ തുടർന്നാണിത്​. തൊഴിലാളിയും സ്​ഥാപന മേധാവിയും കുറ്റക്കാരാണ്​. രണ്ടു പേർക്കും രണ്ട്​ ലക്ഷം റിയാൽ പിഴ ചുമത്തുകയും വിധി നടപ്പിലാക്കിയ ശേഷം തൊഴിലാളിയെ നാട്​ കടത്തണമെന്നും രണ്ട്​ പ്രാദേശിക പത്രങ്ങളിൽ പരസ്യം പ്രസിദ്ധപ്പെടുത്തണമെന്നും കോടതി വിധിച്ചതായി വാണിജ്യമന്ത്രാലയം വ്യക്​തമാക്കി.

വിവിധ രാജ്യങ്ങളിൽ നിന്നുള്ള​ പല തരം അരികൾ കൂട്ടിക്കലർത്തി പാക്കറ്റുകളിലാക്കി മുന്തിയ അരിയാണെന്ന വ്യാജേന  വിൽപന നടത്തുന്ന കേന്ദ്രം തൊഴിൽ മന്ത്രാലയ നിരീക്ഷണ ഉദ്യോഗസ്​ഥരാണ്​ പിടികൂടിയത്​. പരിശോധനയിൽ വിൽപനക്ക്​ തയാറാക്കി വെച്ച പത്ത്​ കിലോ തൂക്കം വരുന്ന 895 അരിച്ചാക്കുകൾ സ്​ഥലത്ത്​ നിന്ന്​ പിടിച്ചെടുത്തിരുന്നു. നിരവധി നിയമ ലംഘനങ്ങൾ ഫാക്​ടറിയിൽ കണ്ടെത്തുകയും മായം ചേർക്കാനുപയോഗിക്കുന്ന പദാർഥങ്ങളും ഉപകരണങ്ങളും പിടിച്ചെടുക്കുകയും ചെയ്​തിരുന്നു.