സൗദിയും ഇൗജിപ്​തും മൂന്ന്​ സഹകരണ കരാറുകളിൽ ഒപ്പുവെച്ചു

റിയാദ്​: സൗദി അറേബ്യയും ഈജിപ്തും മൂന്നു സഹകരണ കരാറുകളും ധാരണാപത്രവും ഒപ്പുവെച്ചു. കിരീടാവകാശി മുഹമ്മദ് ബിൻ സൽമാ​​​െൻറ ഈജിപ്ഷ്യൻ സന്ദര്‍ശനത്തിനിടെയാണ് സുപ്രധാന കരാറുകളില്‍ ഒപ്പു വെച്ചത്. ഈജിപ്തിലെ വിവിധ പദ്ധതികള്‍ കിരീടാവകാശി ഉദ്ഘാടനം ചെയ്തു. സന്ദര്‍ശനം പൂര്‍ത്തിയാക്കി മുഹമ്മദ് ബിന്‍ സല്‍മാന്‍ ബുധനാഴ്​ച  ബ്രിട്ടനിലേക്ക് തിരിക്കും.  ഈജിപ്ത് പ്രസിഡൻറ്​ അബ്​ദുൽഫത്താഹ് അൽ സീസിയുടെയും സൗദി കിരീടാവകാശി മുഹമ്മദ് ബിന്‍സല്‍മാ​​​െൻറയും സാന്നിധ്യത്തിൽ ഇരു രാജ്യങ്ങളിലെയും വിദേശകാര്യ മന്ത്രിമാരാണ് കരാറുകളിൽ ഒപ്പുവെച്ചത്. പരിസ്ഥിതി സംരക്ഷണ മേഖല, സൗദി- ഈജിപ്ത് നിക്ഷേപ ഫണ്ട് സ്ഥാപിക്കുന്നതിനുള്ള ഭേദഗതി, ഇൻവെസ്​റ്റ്​മ​​െൻറ്​ ഫണ്ട് പ്രവർത്തനക്ഷമമാക്കല്‍, നിക്ഷേപം പ്രോത്സാഹിപ്പിക്കൽ  എന്നിവയാണ് ഒപ്പുവെച്ച കരാറുകള്‍. 

ത്രിദിന സന്ദർശനത്തിനായി ഞായറാഴ്ചയാണ് കിരീടാവകാശി കെയ്​റോയിൽ എത്തിയത്. കഴിഞ്ഞ വർഷം കിരീടാവകാശിയായി ചുമതലയേറ്റ ശേഷം മുഹമ്മദ് ബിൻ സൽമാൻ നടത്തുന്ന പ്രഥമ വിദേശ സന്ദർശനമാണിത്. സർവ മേഖലകളിലും സൗദി അറേബ്യയുമായുള്ള സഹകരണം ശക്തമാക്കുന്നതിന് ഈജിപ്ത് ആഗ്രഹിക്കുന്നതായി കിരീടാവകാശിയുമായി നടത്തിയ ചർച്ചയിൽ  പ്രസിഡൻറ്​ അബ്​ദുൽഫത്താഹ് അൽസീസി പറഞ്ഞു. 
കെയ്​റോയിൽ കോപ്റ്റിക് ഓർത്തഡോക്‌സ് പോപ്പി​​​െൻറ ആസ്ഥാനം സന്ദർശിച്ച കിരീടാവകാശി പോപ്പ് തവാദ്രോസ് രണ്ടാമനുമായി കൂടിക്കാഴ്ച നടത്തി. അൽഅസ്ഹര്‍ സര്‍വകലാശാലയിലെ പുനരുദ്ധാരണ നവീകരണ പദ്ധതി കിരീടാവകാശി ഉദ്ഘാടനം ചെയ്തു. സൂയസ് കനാൽ, ഇസ്മായിലിയ ടണൽ എന്നിവയും അദ്ദേഹം സന്ദര്‍ശിച്ചു.