ചെക്​പോയിൻറ്​ ആക്രമണത്തിൽ മരണം നാലായി

ജിദ്ദ: അസീറിൽ ചെക്​പോയിൻറിലുണ്ടായ ​െവടിവെപ്പിൽ മരിച്ച പൊലീസുകാരുടെ എണ്ണം നാലായി. മറ്റ്​ നാലുപേർക്ക്​ പരിക്കേൽക്കുകയും ചെയ്​തതായി ആഭ്യന്തരമന്ത്രാലയം വ്യക്​തമാക്കി. അക്രമത്തിന്​ ശേഷം സ്​ഥലത്ത്​ നിന്ന്​ രക്ഷപ്പെട്ട ആയുധധാരിക​െള പൊലീസ്​ സംഘം ​പിന്തുടർന്നു പിടികൂടി. 
രണ്ടുപേരെ അറസ്​റ്റ്​ ചെയ്​തു. പൊലീസുമായുള്ള വെടിവെപ്പിൽ മൂന്നാമൻ കൊല്ലപ്പെട്ടു. അ​ക്രമത്തിന്​ പിന്നിൽ പ്രവർത്തിച്ചവരെല്ലാം സൗദി പൗരൻമാരാണെന്നും മന്ത്രാലയം കൂട്ടി​ച്ചേർത്തു. 

അസീറിലെ മുജാറദ മേഖലയിലെ ചെക്​പോയിൻറിൽ​ വ്യാഴം അർധരാത്രി 12.40 നാണ്​ വെടിവെപ്പുണ്ടായത്​.  ബരീഖിനും മുജാറദക്കുമിടയിലുള്ള അൽഅർഖൂബ്​ റോഡിലെ ചെക്​പോയിൻറിൽ ഡ്യൂട്ടിയിലുണ്ടായിരുന്ന പൊലീസുകാരാണ്​ മരിച്ചത്​. മൂന്നുപേർ സംഭവസ്​ഥലത്ത്​ തന്നെ മരിച്ചു. സാർജൻറ്​ അഹമദ്​ ഇബ്രാഹിം അസീരി, ഡെപ്യൂട്ടി സർജൻറ്​ അബ്​ദുല്ല ഗാസി അശ്ശഹ്​രി, ഡെപ്യൂട്ടി സർജൻറ്​ സാലിഹ്​ അലി അൽഅംരി എന്നിവരാണ്​ മരിച്ചത്​. ഒരാൾ പിന്നീട്​ ആശുപത്രിയിലും മരിച്ചു​. 

സംഭവത്തിന്​ ശേഷം ഇവിടെ നിന്ന്​ കടന്ന ആക്രമികൾക്കായി വിമാനങ്ങൾ വരെ ഉപയോഗിച്ച്​ നാടിളക്കിയുള്ള തെരച്ചിലാണ്​ നടത്തിയത്​. മണിക്കൂറുകൾക്ക്​ ശേഷമാണ്​ സംഘത്തെ വളഞ്ഞുപിടികൂടിയത്​. രണ്ടുപേർ കീഴടങ്ങിയപ്പോൾ മൂന്നാമൻ പൊലീസിന്​ നേരെ വെടിയുതിർത്ത്​ രക്ഷപ്പെടാൻ ശ്രമിച്ചു. ​
പൊലീസ്​ വെടിവെപ്പിലാണ്​ ഇയാൾ മരിച്ചത്​. ബൻദർ മുഹമ്മദ്​ അലി അശ്ശഹ്​രി എന്നയാളാണ്​ കൊല്ലപ്പെട്ടതെന്ന്​ ആഭ്യന്തരമന്ത്രാലയം അറിയിച്ചു.