പ്രതിസന്ധി പരിഹരിക്കണം  -ജിദ്ദ കാർഗോ അസോസിയേഷൻ

ജിദ്ദ:  സാധാരണക്കാരായ പ്രവാസികളെയും ഇൗരംഗത്ത്​ ജോലി ചെയ്യു​ന്നവരെയും ബാധിക്കുന്ന കാർഗോ പ്രതിസന്ധി എത്രയും വേഗം പരിഹരിക്കണമെന്ന്​ ജിദ്ദ കാർഗോ അസോസിയേഷൻ ഭാരവാഹികൾ വാർത്താസമ്മേളനത്തിൽ ആവശ്യ​പ്പെട്ടു. ഇതിനായി കേന്ദ്ര സർക്കാരിലും ബന്ധപ്പെട്ട മന്ത്രാലയങ്ങളിലും നിവേദനം നൽകും.ജൂലൈ ഒന്നിനാണ്​ യാതൊരു മുന്നറിയിപ്പുമില്ലാതെ ജി.എസ്.ടിയുടെ മറവിൽ കാർഗോക്ക്​ മേൽ നിയന്ത്രണം വന്നത്​. ഓരോ വിദേശ ഇന്ത്യക്കാരനും നാട്ടിലേക്ക്​ സൗജന്യമായി 20,000 രൂപ വരെയുള്ള സാധനങ്ങൾ അയക്കാമായിരുന്നു. ഇൗ സംവിധാനം കേന്ദ്ര സർക്കാർ നിർത്തലാകുകയും പകരം ജി.എസ്.ടി ഇനത്തിൽ  41 ശതമാനം നികുതി ഈടാക്കാൻ തീരുമാനിക്കുകയുമായിരുന്നു. ഇതു മൂലം  ഗൾഫിലെ കാർഗോരംഗം പൂർണമായും സ്തംഭിച്ചിരിക്കുകയാണ്.   
ദിവസേനെ ശരാശരി 300 ടൺ കാർഗോയാണ്​ വിവിധ ഗൾഫ് രാജ്യങ്ങളിൽനിന്നായി കയറ്റി അയക്കപ്പെടുന്നത്​.

നേരിട്ടും അല്ലാതെയും രണ്ടു ലക്ഷത്തോളം പേർ ഈ മേഖലയിൽ ജോലിചെയ്തു വരുന്നു.  പ്രവർത്തനങ്ങൾ ഏകോപിപ്പിക്കുന്നതിന്​ എല്ലാ ഗൾഫ് നാടുകളിലും പ്രവർത്തിക്കുന്ന കാർഗോ കമ്പനികളുടെയും പ്രതിനിധികളെ ഉൾപ്പെടുത്തി വിപുലമായ കൂട്ടായ്മ ഉണ്ടാക്കുകയാണ് ലക്ഷ്യം. അതാത് ഗൾഫ് രാജ്യങ്ങളിൽ  ഈ മേഖലയിൽ പ്രവർത്തിക്കുന്ന വരെ പങ്കെടുപ്പിച്ച്​ ഓരോ കമ്മിറ്റി ക്ക് രൂപം നൽകാനും തീരുമാനിച്ചു.  പ്രസിഡൻറ് പി.പി ആലിപ്പു, ജനറൽ സെക്രട്ടറി മുഹമ്മദ് അഹമ്മദ്, ട്രഷറർ ബാവ, മീഡിയ കോർഡിനേറ്റർ സിയാദ് കൂടിയത്ത് തുടങ്ങിയവർ വാർത്താസമ്മേളനത്തിൽ സംബന്ധിച്ചു.