ഡാകർ റാലിക്കിടെ കാർ അപകടത്തിൽപ്പെട്ടു; സൗദി മത്സരാർഥി പുറത്ത്

ജിദ്ദ: സൗദി അറേബ്യൻ മരുഭൂമിയിലൂടെ നടക്കുന്ന അഞ്ചാമത്​ ഡാകർ റാലി വാഹനയോട്ട മത്സരത്തിടെ കാറപകടം. കാറോടിച്ചിരുന്ന​ സൗദിക്കാരി മഹാ അൽഹംലി മത്സരത്തിൽനിന്ന് പുറത്തായി. മത്സരത്തി​ന്റെ ആറാം ഘട്ടം അവസാനിക്കുന്നതിന് മുമ്പാണ്​ മഹാ അൽഹംലിയുടെ കാർ മറിഞ്ഞത്​.

പരിക്കേറ്റ ഇവരെ എയർ ആംബുലൻസിൽ റിയാദിലെ ആശുപത്രിയിൽ പ്രവേശിപ്പിച്ചു​. ജനുവരി അഞ്ചിന്​ ആരംഭിച്ച ഡാകർ റാലി മത്സരങ്ങൾ തുടരുകയാണ്​. ജനുവരി 19 വരെ 7,800 കിലോമീറ്റർ ദൈർഘ്യമുള്ളതാണ്​ മത്സരം. 418 വാഹനങ്ങളിലായി 585 പേരാണ്​ മത്സരത്തിൽ പ​​​ങ്കെടുക്കുന്നത്​​.