മഖ്‌വ അൽജവ്വയിൽ വാഹനാപകടം; ഒമ്പത്​ പേർക്ക്​ പരിക്ക്​

ജിദ്ദ: തെക്കൻ സൗദിയിലെ മഖ്‌വ ഗവർണറേറ്റിലെ അൽജവ്വയിലുണ്ടായ വാഹനാപകടത്തിൽ ഒമ്പത്​ പേർക്ക്​ പരിക്ക്​. അധ്യാപകരും വിദ്യാർഥിയും ഡ്രൈവർമാരും ഉൾപ്പെടെ ഒമ്പത്​ പേർക്കാണ്​​ പരിക്കേറ്റത്​. വിദ്യാർഥികളെയും അധ്യാപകരെയും കൊണ്ട്​ സ്​കൂളിലേക്ക്​ പോകുകയായിരുന്ന കാറും വാനും കൂട്ടിയിടിക്കുകയായിരുന്നു.

പരിക്കേറ്റ ഒമ്പത്​ പേരിൽ ആറുപേർ അധ്യാപകരാണ്​. ഒരു വിദ്യാർഥിക്കും രണ്ട് ഡ്രൈവർമാർക്കും സാരമായ പരിക്കുണ്ട്. വിവരമറിഞ്ഞ്​ ആംബുലൻസ്​ ടീമുകൾ സ്ഥലത്തെത്തി പ്രാഥമിക ശു​ശ്രൂഷ നൽകി പരിക്കേറ്റവരെ ആശുപത്രിയിലെത്തിച്ചതായി അൽബാഹ റെഡ്​ക്രസൻറ്​ വക്താവ്​ ഇമാദ്​ അൽമുൻസി പറഞ്ഞു. എല്ലാവരെയും അൽ മഖ്‌വ ജനറൽ ആശുപത്രിയിലേക്ക് മാറ്റിയതായും വക്താവ്​ പറഞ്ഞു.