ഒട്ടകത്തോട്​ ക്രൂരമായി പെരുമാറിയ ജീവനക്കാരനെ മുനിസിപ്പാലിറ്റി പിരിച്ചുവിട്ടു

ജിദ്ദ: ഒട്ടകത്തോട്​ ക്രൂരമായി പെരുമാറിയ അറവുശാല ജീവനക്കാരനെ മക്ക മുനിസിപ്പാലിറ്റി പിരിച്ചുവിട്ടു. അറവുശാലയിലെത്തിച്ച ഒട്ടകത്തെ ജീവനക്കാരൻ ക്രൂരമായി മർദിക്കുന്ന വീഡി​േയാ സൗദിയിൽ വൈറലായിരുന്നു. സംഭവം കണ്ടുകൊണ്ട്​ നിന്ന സ്വദേശി പൗരനാണ്​ വീഡിയോ ഷൂട്ട്​ ചെയ്​തത്​. മർദനം തടയാൻ അദ്ദേഹം ശ്രമിച്ചെങ്കിലും ഫലിച്ചില്ല. 

ഒരുമിനിറ്റിലേറെ നീണ്ട വീഡിയോ അദ്ദേഹം സാമൂഹിക മാധ്യമങ്ങളിൽ ഷെയർ ചെയ്​തതോടെ വൻ പ്രതിഷേധം ഉയർന്നു. ഉടനടി പ്രതികരിച്ച മക്ക മുനിസിപ്പാലിറ്റി അറവുശാല ഗാർഡ്​ ഉൾപ്പെടെ സംഭവത്തിൽ ഉൾപ്പെട്ട എല്ലാ ജീവനക്കാർക്കുമെതിരെ ശിക്ഷാനടപടി സ്വീകരിച്ചു. സുഡാൻ സ്വദേശിയായ ഗാർഡ്​, ഒട്ടകങ്ങളെ ഉപദ്രവിച്ച അറവുശാലയിലെ മറ്റുജീവനക്കാർ എന്നിവരെ പിരിച്ചുവിടുമെന്നും അവർ മുനിസിപ്പാലിറ്റിക്ക്​ കീഴിലെ മറ്റേതെങ്കിലും അറവുശാലകളിൽ മേലിൽ ജോലിക്ക്​ ​കയറുന്നത്​ തടയുമെന്നും മുനിസിപ്പാലിറ്റി വക്​താവ്​ ഉസ്​മാൻ മാലി പ്രസ്​താവിച്ചു. അറവുശാല കോൺട്രാക്​ടർക്ക്​ എതിരെയും പിഴയും മറ്റുശിക്ഷാനടപടികളും സ്വീകരിക്കും.