ബുറൈദ ഇൗത്തപ്പഴ മേള അടുത്ത വെള്ളിയാഴ്​ച​ സമാപിക്കും

റിയാദ്​: രാജ്യാന്തര തലത്തിൽ ശ്രദ്ധ നേടിയ ബുറൈദ ഇൗത്തപ്പഴ മേള ഇൗ മാസം ഏഴിന്​ സമാപിക്കും. ആഗസ്​റ്റ്​ മൂന്നിന്​ തുടങ്ങിയ മേള മൊത്തം 42 ദിവസമാണ് നീണ്ടുനിൽക്കുന്നത്​​. ലോകത്തിലെ ഏറ്റവും വലിയ ഇൗത്തപ്പഴ വിപണിയായി അറിയപ്പെടുന്ന ബുറൈദ നഗര മധ്യത്തിലുള്ള ‘സൂഖ്​ തമൂറി’ലാണ്​ മേള. പുലർച്ചെ 4.30 മുതൽ രാവിലെ എട്ട്​ വരെയും വൈകീട്ട്​ 4.30 മുതൽ രാത്രി വൈകുന്നതുവരെയും ചന്ത സജീവമാകും. പ്രതിദിനം 2,000 ത്തിലേറെ വാഹനങ്ങൾ ഇൗത്തപ്പഴങ്ങളുമായെത്തും.

ഇൗത്തപ്പഴ വൈവിധ്യവുമായാണ്​ കച്ചവടക്കാരുടെ വരവ്​. ലേലം വിളിച്ച്​ മൊത്തമായി കച്ചവടം നടത്തലാണ്​ രീതി. മൊത്ത വ്യാപാരമാണ്​ പ്രധാനമെങ്കിലും ചില്ലറ വിൽപനയും കാര്യമായി നടക്കുന്നുണ്ട്​. പോഷകസമൃദ്ധവും സ്വാദിഷ്​ടവും ഗൾഫ് മേഖലയിലാകമാനം പ്രിയങ്കരവുമായ ‘സുക്കരി’യാണ്​ പ്രധാനയിനം. ഇൗയിനത്തിലെ മുഫത്തൽ, ഗാലക്സി, റുത്തബ് എന്നീ ഉപവർഗങ്ങൾക്കാണ് ആവശ്യക്കാർ കൂടുതൽ. സുക്കരിയോട് കിടപിടിക്കുന്ന സങ്കരയിനമായ ‘ശെയ്ശി’ക്കും ആവശ്യക്കാരുണ്ട്​. സുഖ്ഈ, ഖുലാസ്വ്, മുനീഫീ, നബൂത് സൈഫ്, സുൽതാന, ശഖ്റ, റഷൂദി, ബുസ്​റി എന്നീ വൈവിധ്യങ്ങളും വിപണിയിലെത്തുന്നുണ്ട്​. കുറഞ്ഞയിനമായ ‘ബർഹി’, സുക്കരിയിലെ പകുതി പഴുത്ത ‘മുനാസിഫും’ കുറഞ്ഞ വിലക്ക്​ കിട്ടുന്നവയാണ്​.

ബുറൈദ ഇൗത്തപ്പഴ മേളയിൽ നിന്നുള്ള ദൃശ്യങ്ങൾ

മുന്തിയ ഇനങ്ങൾ മൂന്ന്​ കിലോ അടങ്ങുന്ന ഒരു പെട്ടിക്ക്​ ശരാശരി 45 റിയാൽ വില വരും. പേശി വില കുറയ്​ക്കാനാവും. ഇതിൽ തന്നെ മുന്തിയ നിലവാരമുള്ളതിന്​ 100 റിയാലിന്​ അടുത്ത്​ വില​വരും. പുറത്ത്​ കിലോക്ക്​ 40 റിയാലൊക്കെ വിലവരുന്ന ഇനങ്ങളാണ്​ മൂന്ന്​ കിലോ ശരാശരി 45 റിയാൽ വിലയ്​ക്ക്​ ലഭിക്കുന്നത്​. ലക്ഷകണക്കിന്​ ആളുകൾ ഇതിനകം മേള സന്ദർശിച്ചുകഴിഞ്ഞു. മൂന്ന്​​ ലക്ഷത്തിലേറെ കിലോ ഇൗത്തപ്പഴം ഇത്തവണ മേളയിൽ എത്തിയെന്നാണ്​ വിവരം. ഇതിൽ 80 ശതമാനവും സുക്കരി ഇനമാണ്​.