പഴയ കെട്ടിടങ്ങൾ ‘ഈജാർ ഇ’ സംവിധാനത്തിൽ ചേർക്കാനനുവദിക്കില്ല

ജിദ്ദ:പഴയ കെട്ടിടങ്ങൾ ‘ഈജാർ ഇ’ സംവിധാനത്തിൽ ചേർക്കാനനുവദിക്കില്ലെന്ന് ഭവന മന്ത്രാലയം വ്യക്​തമാക്കി. കെട്ടിട കരാറിന്​ എകീകൃത ഇ സംവിധാനം ഏർപെടുത്തുന്നതിനുള്ള നടപടി പുരോഗമിക്കുന്നതിനിടയിലാണ് ഭവന മന്ത്രാലയം ഇക്കാര്യം വ്യക്തമാക്കിയത്. 

നിയമം നടപ്പിലാക്കാൻ തീരുമാനിക്കുമ്പോൾ എത്രകാലം പഴക്കമുള്ള കെട്ടിടങ്ങളാണ് ഇ സംവിധാനത്തിൽ ഉൾപ്പെടുത്തേണ്ടതെന്ന് നിർണയിക്കും. കെട്ടിടം ഉപയോഗിക്കുന്നവരുടെ സുരക്ഷ ഉറപ്പുവരുത്തുന്നതിനും മികച്ച സേവനങ്ങൾക്കുമാണ്  ഗുണമേന്മ നിർണയിക്കുന്നതെന്ന്  ഭവന മന്ത്രാലയ സൂപർവൈസർ  എൻജി. മുഹമ്മദ് അൽബത്വി പറഞ്ഞു.

അടുത്തിടെയാണ് കെട്ടിട കരാറുകൾക്കും മറ്റും ഇ സംവിധാനമേർപ്പെടുത്താൻ ഭവന മന്ത്രാലയം തീരുമാനിച്ചത്. പദ്ധതിയുടെ പരീക്ഷണഘട്ടം ജൂലൈ മുതൽ ആരംഭിക്കുമെന്നും ഈ വർഷാവസാനത്തോടെ ഔദ്യോഗികമായി നടപ്പിലാക്കുമെന്നും റിപ്പോർട്ടുണ്ട്. കച്ചവട മേഖലയെ അടുത്ത വർഷം മുതൽ സംവിധാനത്തിന് കീഴിൽ ഉൾപ്പെടുത്താനും ആലോചനയുണ്ട്.