മക്കയിൽ കെട്ടിടം ചരിഞ്ഞ സംഭവം; പരിശോധനക്ക് പ്രത്യേക സമിതി

ജിദ്ദ: മക്കയുടെ ഹൃദയഭാഗത്ത് താമസ കെട്ടിടം ചരിഞ്ഞ സംഭവത്തെക്കുറിച്ച് അന്വേഷിച്ച് മുനിസിപ്പാലിറ്റി. മക്ക നഗരത്തിലെ ഹഫാഇർ ഡിസ്ട്രിക്ടിലാണ് ബഹുനില കെട്ടിടം തൊട്ടടുത്ത കെട്ടിടത്തിനടുത്തേക്ക് ചരിഞ്ഞത്. ഇതിന്‍റെ ദൃശ്യം സമൂഹ മാധ്യമങ്ങളിൽ വ്യാപകമായി പ്രചരിച്ചിരുന്നു. സിവിൽ ഡിഫൻസ്, ഹജ്ജ് മന്ത്രാലയം, പൊലീസ്, ടൂറിസം വകുപ്പുകളുടെ ഉദ്യോഗസ്ഥരടങ്ങുന്ന പ്രത്യേക സമിതിയുടെ സഹായത്തിലാണ് പരിശോധന നടത്തിയതെന്ന് മുനിസിപ്പാലിറ്റി വക്താവ് ഉസാമ സൈതൂനി പറഞ്ഞു.

മുൻകരുതൽ നടപടിയായി കെട്ടിടം മുഴുവൻ ഒഴിപ്പിച്ചു. കെട്ടിടത്തിന്‍റെ നിലവിലെ സ്ഥിതി, ലൈസൻസ്, സുരക്ഷ എന്നിവ സംബന്ധിച്ച പഠനം പൂർത്തിയാകുന്നതുവരെ അതിനടുത്തേക്ക് ആരും പോകാതിരിക്കാൻ ആവശ്യമായ മുൻകരുതൽ നടപടി സ്വീകരിച്ചതായും വക്താവ് പറഞ്ഞു.