സൗദിയുടെ പൈതൃകം അനാവരണം ചെയ്​ത്​ കൊറിയയിൽ പ്രദർശനം

റിയാദ്​: സൗദി അറേബ്യയുടെയും അറേബ്യൻ ഉപഭൂഖണ്ഡത്തി​​​​െൻറയും സമ്പന്നമായ പൈതൃകം അനാവരണം ചെയ്യുന്ന പ്രദർശനത്തിന്​ ദക്ഷിണകൊറിയയിൽ ഇന്ന്​ തുടക്കമാകും. കൊറിയൻ തലസ്​ഥാനമായ സോളിലെ നാഷനൽ മ്യൂസിയത്തിലാണ്​ 466 അമൂല്യ വസ്​തുക്കളുടെ പ്രദർശനം നടക്കുന്നത്​. 2006 ൽ സൗദി അറേബ്യ ആരംഭിച്ച ‘റോഡ്​സ്​ ഒാഫ്​ അറേബ്യ’ എന്ന സഞ്ചരിക്കുന്ന പ്രദർശനം എത്തുന്ന രണ്ടാമത്തെ ഏഷ്യൻ കേന്ദ്രമാണ്​ സോൾ. മൂന്നുമാസത്തിലേറെ ചൈനയുടെ തലസ്​ഥാനമായ ബീജിങ്ങിൽ തങ്ങിയ ശേഷമാണ്​ കൊറിയയിലേക്ക്​ എത്തിയത്​. ചൈനയിലെ പ്രദർശനം അറേബ്യയെ സംബന്ധിച്ച്​ ആ രാജ്യത്ത്​ നടന്ന ഏറ്റവും വലിയ വൈജ്​ഞാനിക പരിപാടിയായിരുന്നു.  നാല്​ യൂറോപ്യൻ രാജ്യങ്ങളിലും അഞ്ച്​ അമേരിക്കൻ നഗരങ്ങളിലും ‘റോഡ്​സ്​ ഒാഫ്​ അറേബ്യ’ ഇതിനകം പര്യടനം നടത്തിക്കഴിഞ്ഞു. ലോക പ്രശസ്​ത കാഴ്​ചബംഗ്ലാവായ പാരീസിലെ ലൂവ്​റിൽ നടന്ന പ്രദർശനം ഏറെ വാർത്താ പ്രാധാന്യം നേടിയിരുന്നു. 
പ്രദർശനത്തി​​​​െൻറ കിഴക്കൻ ഏഷ്യൻ പാദം കഴിഞ്ഞ വർഷം ഡിസംബറിലാണ്​ സൽമാൻ രാജാവ്​ ഉദ്​ഘാടനം ചെയ്​തത്​. 
കഅ്​ബയുടെ നാലു നൂറ്റാണ്ട്​ പഴക്കമുള്ള അലങ്കാര വാതിലാണ്​ കൊറിയൻ പ്രദർശനത്തിലെ പ്രധാന ആകർഷണങ്ങളിലൊന്ന്​. ഹിജ്​റ വർഷം 1040 ൽ ഉസ്​മാനി സുൽത്താൻ മുറാദ്​ നാലാമ​​​​െൻറ കാലത്ത്​ പണിതതാണ്​ ഇരുവശത്തും ലോഹപ്പണി ചെയ്​ത്​ മനോഹരമാക്കിയ ഇൗ വാതിൽ. ഇതിനൊപ്പം മേഖലയുടെ പ്രാചീന ചരിത്രം വെളിവാക്കുന്ന പുരാവസ്​തുക്കളും പ്രദർശനത്തിനുണ്ട്​.