ലോറ അലോ സൗദി ഡ്രൈവിങ്​ ലൈസൻസ്​ ലഭിക്കുന്ന ആദ്യ യൂറോപ്യൻ വനിത

ജിദ്ദ: സൗദി അറേബ്യയിലെ പ്രശസ്​ത വിദേശ വനിതയായ ലോറ അലോക്ക്​ ഡ്രൈവിങ്​ ലൈസൻസ്​. ഡ്രൈവിങ്​ ലൈസൻസ്​ നേടുന്ന സൗദിയിലെ ആദ്യ യൂറോപ്യൻ വനിതയായി അങ്ങനെ ലോറ. ഫിൻലൻഡുകാരിയായ ലോറ, സൗദി അറേബ്യയെ കുറിച്ചുള്ള പ്രമുഖ യാത്ര ബ്ലോഗായ ബ്ലൂ അബായയുടെ സ്​ഥാപകയാണ്​. 

റിയാദിലെ ട്രാഫിക്​ ഒാഫീസിൽ നിന്നാണ്​ ലോറക്ക്​ ലൈസൻസ്​ ലഭിച്ചത്​. ലൈസൻസ്​ ലഭിച്ച വിവരം ട്വിറ്ററിൽ അറിയിച്ച അവർ, ലൈസൻസ്​ നേടുന്ന ആദ്യ യൂറോപ്യൻ വനിതയാണ്​ താനെന്ന്​ ട്രാഫിക്​ അധികൃതർ പറഞ്ഞെന്നും സൂചിപ്പിച്ചു. നടപടി ക്രമങ്ങൾ ലളിതമായും ആയാസ രഹിതമായും നിർവഹിച്ച റിയാദ്​ ട്രാഫിക്​ അധികൃതർക്ക്​ അവർ നന്ദിയും പറഞ്ഞു. 

സഞ്ചാര സാഹിത്യകാരിയും ഫോ​േട്ടാഗ്രാഫറുമായ ലോറ 10 വർഷം മുമ്പാണ്​ സൗദിയിലെത്തുന്നത്​. സൗദിയുടെ ചരിത്രത്തിലും സംസ്​കാരത്തിലും പ്രകൃതിയിലും ആകൃഷ്​ടയായ അവർ ഇൗ വിശിഷ്​ട ദേശത്തെ ലോകത്തിന്​ പരിചയപ്പെടുത്തുകയെന്ന ദൗത്യം സ്വയം സ്വീകരിക്കുകയായിരുന്നു. 

സൗദി ടൂറിസത്തെ പുറംലോകത്തിന്​ പരിചയപ്പെടുത്തിയ ആദ്യ വനിതയാകുകയായിരുന്നു അങ്ങനെ അവർ. അതിനായി 2010ൽ അവർ തുടങ്ങിയ ‘ബ്ലൂ അബായ’ എന്ന ബ്ലോഗ്​ ലോക പ്രശസ്​തമാണ്​. ആ ബ്ലോഗ്​ വഴി സൗദി അറേബ്യയുടെ മറഞ്ഞിരിക്കുന്ന അത്​ഭുതങ്ങളെ അവർ ​േലാകത്തിന്​ കാട്ടിക്കൊടുത്തു. 2013ൽ ഏറ്റവും മികച്ച ഏഷ്യൻ വെബ്ലോഗ്​ ആയി ബ്ലൂ അബായ തിരഞ്ഞെടുക്കപ്പെട്ടു. 

സൗദി ടൂറിസത്തിന്​ നൽകുന്ന പിന്തുണ പരിഗണിച്ച്​ 2014ൽ സൗദി എക്​സലൻസ്​ ഇൻ ടൂറിസം അവാർഡി​ന്​ തെര​ഞ്ഞെടുത്തു. 2017ൽ അറബ്​ ലോകത്ത്​ വസിക്കുന്ന ഏറ്റവും സ്വാധീനശേഷിയുള്ള 10 വിദേശ വ്യക്​തികളിൽ ഒരാളായി അംഗീകരിച്ചു. സൗദി ടൂറിസം ​േ​പ്രാത്സാഹിപ്പിക്കുന്നതിനായി ‘ഇൻസ്​പയേർഡ്​ ബൈ അറേബ്യ’ എന്ന പേരിൽ സമ്മാനങ്ങളും സ്​മരണികകളും നൽകുന്ന ഒരു ഷോപ്പ്​ 2013ൽ അവർ ആരംഭിച്ചു. സൗദി അറേബ്യക്ക്​ വേണ്ടി ലോറ നൽകിയ സേവനങ്ങൾക്കുള്ള മികച്ച പാരിതോഷികം തന്നെയായി അവർക്ക്​ അംഗീകാരം.