ബെയ്​റൂത്ത്​ സ്​ഫോടനം: ഇരകൾക്ക്​ സഹായമെത്തിക്കാൻ​​ സൽമാൻ രാജാവ്​ ഉത്തരവിട്ടു

ജിദ്ദ: ബെയ്​റൂത്ത്​ സ്​ഫോടനത്തിൽ​ ദുരിതത്തിലായവർക്ക്​ ജീവകാരുണ്യ സഹായങ്ങൾ എത്തിക്കാൻ സൗദി ഭരണാധികാരി സൽമാൻ രാജാവ്​ നിർദേശം നൽകി. ബെയ്​റൂത്ത്​ തുറമുഖത്ത്​ നൂറിലധികമാളുകൾ മരിക്കാനും നിരവധി​ പേർക്ക്​ ​പരിക്കേൽക്കാനും ഇടയാക്കിയ വൻസ്​ഫോടനം ചൊവാഴ്​ചയാണുണ്ടായത്​. സംഭവം നടന്നയുടനെ സ്​ഫോടനത്തിൽ ഇരകളായവർക്ക്​ സൗദി അറേബ്യ പുർണ പിന്തുണയും ​െഎക്യദാർഢ്യവും പ്രഖ്യാപിച്ചിരുന്നു. ഇതിനു പുറമെയാണ്​ മാനുഷിക സഹായങ്ങൾ എത്തിക്കാൻ സൽമാൻ രാജാവ്​ ഉത്തരിട്ടത്​.

നിർദേശം ലഭിച്ചയുടൻ സഹായങ്ങൾ നൽകാൻ നടപടി സ്വ​ീകരിച്ചതായി സൗദി വിദേശ കാര്യാലയം വ്യക്തമാക്കി. കിങ്​ സൽമാൻ റിലീഫ്​ സെൻറർ (കെ.എസ്​. റിലീഫ്​) വഴിയാണ്​ അടിയന്തിര സഹായമെത്തിക്കുന്നത്​. റിലീഫ്​ സെൻറർ വഴി ലെബനാൻ ജനതയെ​ സഹായിക്കാൻ നിർദേശം നൽകിയ സൽമാൻ രാജാവിന്​ സെൻറർ ജനറൽ സൂപർവൈസർ ഡോ. അബ്​ദുല്ല ബിൻ അബ്​ദുൽ അസീസ്​ അൽറബീഅ നന്ദിയും അനുമോദനവും അറിയിച്ചു.

സൗദി ഭരണകൂടം നടത്തുന്ന ജീവകാരുണ്യപ്രവർത്തനങ്ങളുടെ തുടർച്ചയാണിത്​. ദുരന്തങ്ങളും പ്രതിസന്ധികളും ഉണ്ടാകുന്ന രാജ്യങ്ങൾക്കൊപ്പം സൗദി അറേബ്യ എപ്പോഴും സഹായ ഹസ്​തങ്ങളുമായി നിലകൊണ്ടിട്ടുണ്ട്​. സ്​​ഫോടനത്തിൽ മരിച്ചവർക്ക്​ ദൈവകാരുണ്യമുണ്ടാക​​​ുകയും പരിക്കേറ്റവർ​ വേഗം സു​ഖംപ്രാപിക്കുകയും ചെയ്യ​​െട്ട​യെന്നും ഡോ. അബ്​ദുല്ല അൽറബീഅ പ്രാർഥിച്ചു.

ലോകത്തെവിടെയും ദുരിതമനുഭവിക്കുന്നവർക്ക്​ സഹായം നൽകുന്ന രാജ്യങ്ങളിൽ സൗദി അറേബ്യ എപ്പോഴും മുൻപന്തിയിലാണെന്ന്​ ഒ.​െഎ.സി സെക്രട്ടറി ജനറൽ ഡോ. യൂസഫ്​ ബിൻ അഹ്​മദ്​ അൽഉതൈമീൻ പറഞ്ഞു.

ലബനാൻ മെഡിക്കൽ സംഘവുമായി സഹകരിച്ചാണ്​ കെ.എസ്​. റിലീഫ്​ ദുരിതാശ്വാസ പ്രവർത്തനങ്ങൾ നടത്തുന്നതും സഹായങ്ങൾ എത്തിക്കുന്നതും. സെൻററി​െൻറ കീഴിലുള്ള മെഡിക്കൽ സൊസൈറ്റികൾ അടിയന്തിര ചികിത്സ, ആംബുലൻസ്​ സൗകര്യങ്ങളുമായി സേവന രംഗത്തുണ്ട്​. കേന്ദ്രത്തി​െൻറ സുബുലു സലാം സൊസൈറ്റിക്ക്​ കീഴിലുള്ള ആംബുലൻസ്​ ടീമുകൾ, അർസാൽ പട്ടണത്തിലെ മർകസ്​ അമലിലെ വിദഗ്​ധ സംഘം എന്നിവ സ്​ഫോടനം നടന്ന ഉടനെ അടിയന്തിര രക്ഷാപ്രവർത്തനങ്ങൾക്കായി ബെയ്റുത്തിലെത്തിയിട്ടുണ്ട്​.