ജിദ്ദയിലെ ‘ബസ്​ത മാർക്കറ്റി’ ൽ  ആദ്യദിവസമെത്തിയത്​ 8500 പേർ

ജിദ്ദ: ജിദ്ദ ചേംബർ ആരംഭിച്ച മൂന്നാമത്​ ‘ബസ്​ത മാർക്കറ്റി’ ൽ ആദ്യദിവസമെത്തിയത്​ 8500 പേർ. വിവിധ മേഖലകളിൽ ആഴ്​ച​ േതാറും നടന്നുവന്നിരുന്ന സീസൺ കച്ചവടത്തിന്​ ഉണർവ്​ പകരുക എന്ന ഉദ്ദേശ്യത്തോ​ടെയാണ്​  ചേംബർ മുഖ്യ ആസ്​ഥാനത്തിനടുത്ത്​ 8000 സ്​ക്വയർ മീറ്ററിൽ​ ‘ബസ്​ത മാർക്കറ്റ്​’ എന്ന പേരിൽ സൂഖ്​ ഒരുക്കിയിരിക്കുന്നത്​. ചെറുകിട സ്​ഥാപനങ്ങളെ പ്രോൽസാഹിപ്പിക്കുകയും കൂടുതൽ തൊഴിലവസരമൊരുക്കലും പദ്ധതിയുടെ ലക്ഷ്യമാണ്​​​. വെള്ളിയാഴ്​ചയാണ്​ ബസ്​ത മാർക്കറ്റ്​ പ്രവർത്തിക്കുക. മൂന്ന്​ മാസം നീണ്ടു നിൽക്കും.

250 ബസ്​തകൾ ഉൾക്കൊള്ളാൻ പാകത്തിലാണ്​ സ്​ഥലമൊരുക്കിയിരിക്കുന്നത്​​. ഇത്​ മൂന്നാം തവണയാണ്​ ജിദ്ദ ചേംബർ ബസ്​ത മാർക്കറ്റ്​ ഒരുക്കുന്നത്​. നേരത്തെ നടന്ന ബസ്​ത മാർക്കറ്റ്​ വിജയകരമായിരുന്നുവെന്ന്​ ജിദ്ദ ചേംബർ ഭരണസമിതി അംഗം ഫാഇസ്​ ബിൻ അബ്​ദുല്ല അൽഹർബി പറഞ്ഞു. പ്രാദേശികമായ ധാരാളം ഉൽപന്നങ്ങൾ പരിചയപ്പെടുത്താൻ ഇതിലൂടെ  സാധിച്ചിട്ടുണ്ട്​. ഇൗ വർഷം ഭക്ഷ്യവിഭവങ്ങൾ, വീട്ടുപകരണങ്ങൾ, വിനോദ ഉപകരണങ്ങൾ, കളിക്കോപ്പുകൾ, കുടുംബത്തിനാവശ്യമായ വസ്​തുക്കൾ, ഗിഫ്​റ്റുകൾ എന്നിങ്ങനെ 8000 ത്തിലധികം വസ്​തുകൾ വിവിധ ബസ്​തകളിലായി ഒരുക്കിയിട്ടുണ്ട്​.

കാലോചിതമായി സീസൺ കച്ചവടത്തെ മാറ്റുന്നതാണ്​ ബസ്​ത മാർക്ക​റ്റെന്നും അദ്ദേഹം  പറഞ്ഞു. ബസ്​തകൾ വാടകക്ക്​ നൽകുന്ന നടപടികൾ ഇലക്​ട്രോണിക്​ സംവിധാനത്തിലൂടെയാണ്​. ‘ഭക്ഷ്യ ഉന്തുവണ്ടികൾ’ എന്ന പേരിലൊരു പദ്ധതി ഇൗ വർഷം പുതുതായി ആരംഭിച്ചിട്ടുണ്ട്​. സിവിൽ ഡിഫൻസുമായി സഹകരിച്ച്​ ആവശ്യമായ സുരക്ഷാ സംവിധാനങ്ങളൊരുക്കിയാണ്​ ബസ്​തകൾ സംവിധാനിച്ചിരിക്കുന്നത്​. സ്​ത്രീകൾക്കും പുരുഷന്മാർക്കും നമസ്​കരിക്കാനും അംഗ ശുചീകരണത്തിനുമുള്ള  സൗകര്യങ്ങളുണ്ടെന്നും അദ്ദേഹം പറഞ്ഞു.