സൗദി സ്ഥാപകദിനാഘോഷം: സൗജന്യ പുരാവസ്തു പ്രദർശനം

റിയാദ്: സൗദി സ്ഥാപകദിനാഘോഷത്തോട്​ അനുബന്ധിച്ച്​ നടത്തുന്ന പുരാവസ്തു പ്രദർശനത്തിന് റിയാദ് നസ്​റിയയിലെ പാലസ് മ്യൂസിയത്തിൽ തുടക്കമായി. 30ഓളം ആളുകളുടെ വ്യത്യസ്ത പുരാവസ്തു പ്രദർശനം വ്യാഴാഴ്​ചയാണ്​ ആരംഭിച്ചത്​. ഞായറാഴ്​ച വരെ എല്ലാ ദിവസവും വൈകീട്ട് അഞ്ച്​ മുതൽ രാത്രി 10 വരെയാണ് പ്രദർശനം. സൗജന്യമായാണ് പ്രവേശനം.

പൗരാണിക കാലഘട്ടങ്ങളിൽ ഉപയോഗിച്ച വാളുകൾ, സൗദിയിലെ അബ്​ദുൽ അസീസ് രാജാവ് മുതലുള്ളവരുടെ പഴയകാല ചിത്രങ്ങൾ, അബ്ബാസിയ-റാഷിദിയ കാലഘട്ടങ്ങളിലെ നാണയങ്ങൾ, നോട്ടുകൾ, സ്​റ്റാമ്പുകൾ, ഇന്ത്യൻ രൂപയുടെ നാണയങ്ങൾ, ഇന്ത്യയുടെ 500-1000 വർഷങ്ങൾ പഴക്കമുള്ള നാണയങ്ങൾ, ഗാന്ധിജിയുടെ 50ൽ കൂടുതൽ രാജ്യങ്ങൾ ഇറക്കിയ സ്​റ്റാമ്പുകൾ, എലിസബത്ത് രാജ്ഞി, ഡയാന രാജകുമാരി എന്നിവരുടെ സ്​റ്റാമ്പ് കലക്ഷനുകൾ, പല രാജ്യങ്ങളുടെയും സ്വർണ നോട്ടുകൾ, 170ൽപരം രാജ്യങ്ങളുടെ പതാക സ്​റ്റാമ്പുകൾ, 100 ൽപരം രാജ്യങ്ങളുടെ ത്രികോണ സ്​റ്റാമ്പുകൾ, പോസ്​റ്റൽ കാർഡുകൾ, പെയിൻറിങ് ചിത്രങ്ങൾ, തോലുകളിൽ ആലേഖനം ചെയ്ത ചിത്രങ്ങൾ, മെഡലുകൾ, പഴയകാല കളിക്കോപ്പുകൾ എന്നിവാണ് എക്സിബിഷൻ നടക്കുന്ന പാലസ് മ്യൂസിയത്തിൽ ഒരുക്കിയിരിക്കുന്നത്.

വിവരങ്ങൾക്ക് കോഓഡിനേറ്റർ അബ്​ദുൽ അസീസ് കടലുണ്ടിയുമായി (0532528262) ബന്ധപ്പെടാം.