‘പൊതുമാപ്പിനെ’ കുറിച്ചുള്ള മലയാളികളുടെ ഹ്രസ്വചിത്രം ശ്രദ്ധേയമായി 

റിയാദ്​: സൗദി അറേബ്യ പ്രഖ്യാപിച്ച ‘നിയമ ലംഘകരില്ലാത്ത രാജ്യം’ ദേശീയ കാമ്പയി​​​െൻറ പ്രാധാന്യം വിളംബരം ചെയ്​ത്​ പ്രവാസി മലയാളികൾ അണിയിച്ചൊരുക്കിയ ഹ്രസ്വ ചിത്രം ശ്രദ്ധേയമാകുന്നു. പൊതുമാപ്പ്​ കാലാവധി അവസാനിച്ചിട്ടും യൂടൂബിൽ റിലീസ്​ ചെയ്​ത ചിത്രം ആളുകൾ കാണുകയും വിലയിരുത്തുകയും ചെയ്യുന്നു. കെ.എം.സി.സി റിയാദ്​ സെൻട്രൽ കമ്മിറ്റിക്ക്​ കീഴിലുള്ള സൈബർവിങ്​ നിർമ്മിച്ച ‘മുന്നറിയിപ്പ്’ എന്ന ചിത്രം പ്രവാസലോകത്തെ നിയമ ലംഘകരായ സാധാരണക്കാരായ വിദേശ തൊഴിലാളികളുടെ നേർചിത്രമാണ് പങ്കുവെക്കുന്നത്. 

സൗദി അറേബ്യയിൽ വർഷങ്ങളായി നിയമ കുരുക്കിൽ കുടുങ്ങി കേരളത്തിലേക്ക് മടങ്ങാൻ കഴിയാതെ ദുരിതം നേരിടുന്ന രണ്ടു പേരുടെ ജീവിതമാണ് ഹ്രസ്വചിത്രത്തി​​െൻറ ഇതിവൃത്തം. ഇനിയൊരു പൊതുമാപ്പ് ഉണ്ടാകില്ലെന്നും ഇപ്പോൾ ലഭിച്ച അവസരം പ്രയോജനപ്പെടുത്തി രാജ്യം വിടണമെന്ന സന്ദേശമാണ് ചിത്രം പങ്കുവെക്കുന്നത്. 

ഹ്രസ്വചിത്രത്തി​​െൻറ അരങ്ങിലും അണിയറയിലും പ്രവർത്തിച്ചതെല്ലാം റിയാദിലുള്ള മലയാളി കലാകാരന്മാരാണ്. റഫീഖ് തിരുവിഴാംകുന്ന് രചനയും സംവിധാനവും നിർവഹിച്ച ചിത്രത്തിൽ നസീബ് കലാഭവൻ, ഷംനാദ് കരുനാഗപ്പള്ളി, ഇർഷാദ് കായാക്കുൾ, ഷാജി ആലപ്പുഴ എന്നിവരാണ് വേഷമിട്ടത്. കാമറ അനിൽകുമാർ തമ്പുരുവും എഡിറ്റിങ്​ കനേഷ് ചന്ദ്രനും ശബ്​ദ നിയന്ത്രണം ജോസ്​ കടമ്പനാടും ഡബ്ബിങ്​ സുബി സജിനും നിർവഹിച്ചു. ഷെഫീർ മുഹമ്മദ്, ഷാഹുൽ ചെറുപ്പ എന്നിവരാണ്​ സംവിധാന സഹായികൾ. ഷെഫീഖ് കൂടാളിയാണ് നിർമാണ മേൽനോട്ടം.