‘ബിബാൻ ഫോറത്തി​’ന്റെ ആദ്യ ദിനം ഒപ്പിട്ടത്​​ ആറ്​ ബില്യൺ ഡോളറി​ന്റെ കരാറുകൾ​

റിയാദ്​: ആറ്​ ബില്യൺ യു.എസ് ഡോളർ മൂല്യമുള്ള എട്ട് ധനകാര്യ ഇടപാടുകളോടെയാണ് സ്​റ്റാർട്ടപ്​ സംരംഭകത്വ സമ്മേളനമായ ‘ബിബാൻ 2025’ ഫോറത്തിന്​ റിയാദിൽ തുടക്കമായത്. ചെറുകിട, ഇടത്തരം സംരംഭക ജനറൽ അതോറിറ്റിയും (മുൻശആത്ത്) നിരവധി ദേശീയ ബാങ്കുകളും തമ്മിലാണ്​ കരാറുകൾ ഒപ്പുവെച്ചത്​. ചെറുകിട, ഇടത്തരം സംരംഭങ്ങളെ (എസ്​.എം.ഇ സംരംഭങ്ങൾ) പിന്തുണക്കുക എന്നതാണ് ഈ ധനസഹായ കരാറുകളുടെ ലക്ഷ്യം.

പുരുഷ-വനിത സംരംഭകരെ ശാക്തീകരിക്കുക എന്നതും ലക്ഷ്യമാണ്. റിയാദ് ബാങ്കുമായി 1.3 ബില്യൺ ഡോളറി​ന്റെയും അൽരാജ്ഹി ബാങ്കുമായി ഒരു ബില്യൺ ഡോളറി​ന്റെയുമാണ്​ കരാറുകൾ. അറബ് നാഷണൽ ബാങ്ക് 533 മില്യൺ ഡോളറി​ന്റെ കരാറിലാണ്​ ഒപ്പുവച്ചത്​. 266 മില്യൺ ഡോളറി​ന്റെ ധനസഹായ കരാറാണ്​ അലിൻമ ബാങ്കുമായി ഒപ്പുവച്ചത്​. അൽജസിറ ബാങ്കുമായി 266 മില്യൺ ഡോളറി​േൻറതാണ്​ കരാർ.

സൗദി ഫ്രാൻസി ബാങ്കുമായി 700 മില്യൺ ഡോളറി​ന്റെ കരാറിലും ഒപ്പിട്ടു. സൗദി നാഷണൽ ബാങ്കുമായി 1.3 ബില്യൺ ഡോളറി​േൻറതാണ്​ ധാരണാപത്രം​. അൽബിലാദ് ബാങ്ക് 773 മില്യൺ ഡോളർ ധനസഹായ പോർട്ട്‌ഫോളിയോ പ്രഖ്യാപിച്ചു. മത്സരാധിഷ്ഠിത ധനസഹായ അന്തരീക്ഷം പ്രോത്സാഹിപ്പിക്കുന്നതിനും സാമ്പത്തിക വികസനത്തിൽ സജീവ പങ്ക് വഹിക്കാൻ ചെറുകിട ഇടത്തരം സംരംഭങ്ങളെ ശാക്തീകരിക്കുന്നതിനുമാണ്​ ഈ കരാറുകൾ. മൊത്ത ആഭ്യന്തര ഉൽപ്പാദനത്തിൽ ചെറുകിട, ഇടത്തരം സംരംഭകത്വ മേഖലയുടെ സംഭാവന വർദ്ധിപ്പിക്കാൻ ലക്ഷ്യമിടുന്ന ‘സൗദി വിഷൻ 2030’ന് അനുസൃതമാണിത്.

​