വാഹനാപകടം: രണ്ട്​ വർഷത്തിലധികം ആശുപത്രിയിൽ കഴിഞ്ഞ  ഇന്ത്യക്കാരൻ മരിച്ചു

അൽ-ജൗഫ്: വാഹനാപകടത്തിൽ തലക്ക്​  സാരമായി പരിക്കേറ്റ് കഴിഞ്ഞ രണ്ടു വർഷത്തിലധികമായി സക്കാക്ക സെൻട്രൽ ആശുപത്രി തീവ്രപരിചരണ വിഭാഗത്തിൽ ചികിത്സയിലായിരുന്ന യു.പി സ്വദേശി മരിച്ചു. ഗാസിപൂർ, ജലാലാബാദ് സ്വദേശി ദയാരാജ്ഭർ (39) ആണ്​ കഴിഞ്ഞ ദിവസം മരിച്ചത്​. 2016 ഫെബ്രുവരി 19^ന് രാത്രി എട്ട്​ മണിക്ക്​ ദയാരാജ് സഞ്ചരിച്ച സൈക്കിളിൽ ട്രാഫിക് നിയമം ലംഘിച്ച്  എതിർ ദിശയിൽ വാഹനമോടിച്ചെത്തിയ സ്വദേശി യുവാവി​​​െൻറ വാഹനം ഇടിച്ച് തെറിപ്പിക്കുകയായിരുന്നു. അന്നു മുതൽ അബോധാവസ്​ഥയിലായിരുന്നു. പിറ്റേദിവസം നാട്ടിലേക്ക് യാത്ര തിരിക്കാനിരിക്കെയായിരുന്നു അപകടം.

സ്പോൺസറും സാമൂഹ്യ പ്രവർത്തകരും നാട്ടിലെത്തിക്കുന്നതിനായി പലതവണ ശ്രമിച്ചിരുന്നുവെങ്കിലും മോശം ആരോഗ്യാവസ്​ഥ തടസ്സമായി. തീവ്രപരിചരണ വിഭാഗത്തിലെ മലയാളി ഹെഡ്‌ നഴ്സുമാരായ ജോത്സന ടെലൻസ്, റാൻസി  ബിപിൻ എന്നിവരുടെ പ്ര​േത്യക സാന്ത്വന പരിചരണം ദയാരാജിന് ലഭിച്ചിരുന്നു.  മൃതദേഹം ഞായറാഴ്ച വൈകിട്ട് സൗദി എയർലൈൻസ്​  വിമാനത്തിൽ കൊണ്ടുപോയി.  

തിങ്കളാഴ്ച രാവിലെ ഒമ്പത്​  മണിക്ക്​  ലഖ്​നോ എയർപോർട്ടിൽ എത്തിചേരും. ബന്ധുക്കൾ ഏറ്റുവാങ്ങുന്ന മൃതദേഹം സ്വദേശത്തെത്തിച്ച് സംസ്കരിക്കും. മൃതദേഹം നാട്ടിലെത്തിക്കുന്നതിനുള്ള പൂർണ ചെലവുകൾ സ്പോൺസർ വഹിച്ചു. അൽ-ജൗഫ് വെൽഫെയർ അസോസിയേഷൻ ജനറൽ സെക്രട്ടറിയും സാന്ത്വനം സമതി കൺവീനറുമായ സുധീർ ഹംസ നടപടിക്രമങ്ങൾ പൂർത്തിയാക്കുന്നതിന് സഹായ സഹകരണങ്ങൾ ചെയ്​തു.