പാതി തളർന്ന ജീവിതവുമായി അബ്​ദുൽകരീം മടങ്ങി

റിയാദ്​: രോഗം പാതി തളർത്തിയ ജീവിതവുമായി അബ്​ദുൽകരീം മടങ്ങി. തിരുവനന്തപുരം വിതുര തൊളിക്കോട് സ്വദേശിയായ ഇദ്ദേഹം സാമൂഹികപ്രവർത്തകരുടെ സഹായത്തോടെയാണ്​ അഞ്ചുവർഷത്തിനുശേഷം നാടണഞ്ഞത്​.​ 21 വർഷമായി റിയാദിലെ സ്വകാര്യ ബേക്കറിയിൽ ജീവനക്കാരനായിരുന്നു. തൊഴിലുടമയുടെ മരണത്തെ തുടർന്നുള്ള നിയമപ്രശ്​നങ്ങളാൽ ഇഖാമ പുതുക്കാത്തതാണ്​​ അഞ്ചുവർഷത്തിനിടെ​ നാട്ടിലേക്കുള്ള വഴിയിൽ കടമ്പ തീർത്തത്​. അതിനിടയിൽ രോഗം പിടിപെട്ടത്​ കൂടുതൽ ദുരിതക്കയത്തിലാക്കി.

ജൂലൈ 10ന്​ പക്ഷാഘാതം പിടിപെട്ട്​ റിയാദിലെ താമസസ്ഥലത്ത്​ കുഴഞ്ഞുവീഴുകയായിരുന്നു. വിവരമറിഞ്ഞ്​ സാമൂഹികപ്രവർത്തകരെത്തി റിയാദിലെ അൽഹയാത്ത്​ ആശുപത്രിയിൽ പ്രവേശിപ്പിച്ചു. വർഷങ്ങളായി ഇഖാമ പുതുക്കാത്തതിനാൽ ഇൻഷുറൻസുണ്ടായിരുന്നില്ല. ശിഹാബ്​ കൊട്ടുകാടി​െൻറ നേതൃത്വത്തിൽ സാമൂഹികപ്രവർത്തകർ കമ്പനി മാനേജറുമായി സംസാരിച്ച്​ വേഗത്തിൽ മെഡിക്കൽ ഇൻഷുറൻസ്​ ലഭ്യമാക്കിയതിനാൽ ആശുപത്രി ചികിത്സ സുഗമമായി നടന്നു.

തല​ച്ചോറിൽ രണ്ട്​ മേജർ ശസ്​ത്രക്രിയകൾ നടത്തി. രണ്ടാമത്തെ ശസ്​ത്രക്രിയക്ക്​ ശേഷം തലയോട്ടിയുടെ ഒരു ഭാഗം വയറ്റിൽ സൂക്ഷിച്ചിരിക്കുകയാണ്​. മൂന്ന്​ മാസത്തിന്​ ശേഷമേ അത്​ പഴയസ്ഥാനത്ത്​ പുനഃസ്ഥാപിക്കാനാവൂ. നാട്ടിലെത്തി കൂടുതൽ വിദഗ്​ധ ചികിത്സ ആവശ്യമാണ്​. എത്രയും വേഗം നാട്ടിലെത്തിക്കാനുള്ള ശ്രമത്തി​െൻറ ഭാഗമായി ശിഹാബി​െൻറ ഇടപെടലിൽ തർഹീലിൽനിന്ന്​ ഫൈനൽ എക്​സിറ്റ്​ വിസ ശരിയാക്കി.

നാട്ടിൽ കൊണ്ടുപോകുന്നതിനുള്ള യാത്രാചെലവും മറ്റും വഹിക്കാൻ ഇദ്ദേഹം ജോലി ചെയ്​തിരുന്ന കമ്പനിയധികൃതർ തയാറായി. നാട്ടിൽ ചികിത്സക്കായി ചെറിയൊരു തുകയുടെ സഹായം സ്​പോൺസറുടെ മകൻ നൽകി. കഴിഞ്ഞദിവസം സൗദി എയർലൈൻസ്​ വിമാനത്തിൽ നാട്ടിലേക്ക്​ യാത്രയായി. കൊട്ടാരക്കര കുന്നിക്കോട്​ സ്വദേശി ഷംനാദാണ്​ യാത്രയിൽ സഹായിയായി ഒപ്പം പോയത്​.

ശിഹാബിനോടൊപ്പം നിസാർ, സലാം, നൗഷാദ്​ ആലുവ, സാബിത്ത്​, ഡൊമിനിക്​ സാവിയോ, നൗഷാദ്​ കുന്നിക്കോട്​, സലാം പെരുമ്പാവൂർ, അനീഷ്​, നഴ്​സിങ്​ സ്​റ്റാഫുമാരായ മെർലിൻ, ജസ്​റ്റിൻ, കമ്പനി മാനേജർ അബ്​ദുൽ വഹാബ്​ എന്നിവരാണ്​ ആശുപത്രിയിൽ പ്രവേശിപ്പിച്ചത്​ മുതൽ നാട്ടിലെത്തിക്കുന്നതുവരെ സഹായിക്കാൻ രംഗത്തുണ്ടായിരുന്നത്​.