മൂന്നര​ പതിറ്റാണ്ടി​െൻറ പ്രവാസം അവസാനിപ്പിച്ച്​ അബ്​ദുൽ വഹാബ് - ഷക്കീല ടീച്ചർ ദമ്പതികൾ​ മടങ്ങുന്നു

റിയാദ്: മൂന്നര​ പതിറ്റാണ്ട്​ നീണ്ട പ്രവാസം അവസാനിപ്പിച്ച്​ അബ്​ദുൽ വഹാബ്, ഷക്കീല ടീച്ചർ ദമ്പതികൾ മടങ്ങുന്നു. റിയാദിലെ പ്രവാസി സമൂഹത്തിനിടയിൽ അറിയപ്പെടുന്ന സാമൂഹികപ്രവർത്തകയും അധ്യാപികയും എഴുത്തുകാരിയുമാണ്​ ഷക്കീല ടീച്ചർ. റിയാദിലെ ഗൾഫ് താലീദ് ഗ്രൂപ്​ കമ്പനിയിൽ ചീഫ്​ അക്കൗണ്ടൻറായിരുന്നു അബ്​ദുൽ വഹാബ്​. 35 വർഷത്തെ സേവനത്തിനൊടുവിൽ അടുത്തിടെയാണ്​ അദ്ദേഹം ​വിരമിച്ചത്​. റിയാദ്​ ഇൻറർനാഷനൽ പബ്ലിക്​ സ്​കൂളിൽ മലയാളം അധ്യാപികയായ ഷക്കീല വഹാബ്​ ജോലി രാജിവെച്ചാണ്​ ഭർത്താവിനോടൊപ്പം മടങ്ങുന്നത്​.

ആലപ്പുഴ സ്വദേശികളായ ഇൗ ദമ്പതികൾ ചൊവ്വാഴ്ച നാട്ടിലേക്ക്​ മടങ്ങും. ആലപ്പുഴ ജില്ലയിലെ ചൈൽഡ് ഡെവലപ്മെൻറ്​ കൗൺസിലിൽ ഫാക്കൽറ്റി ആയാണ്​ ഇനി ഷക്കീല ടീച്ചറുടെ ഒൗദ്യോഗിക ജീവിതം. ആലപ്പുഴ ടൗണിലെ വെള്ളക്കിണർ ദാറുൽ അമീൻ കുടുംബത്തിൽ ഇനി വിശ്രമജീവിതത്തിലാവും അബ്​ദുൽ വഹാബ്​. റിയാദ്​ പബ്ലിക്​ സ്‌കൂളിൽ ആദ്യമായി മലയാളം വകുപ്പിന്​ തുടക്കം കുറിച്ചത്​ രസതന്ത്രം ബിരുദധാരിണിയായ ഷക്കീല ടീച്ചറാണെന്നത്​ കൗതുകമുണർത്തുന്ന കാര്യമാണ്​. എന്നാൽ മലയാള ഭാഷയോടുള്ള അടങ്ങാത്ത അഭിനിവേശമാണ്​ ശാസ്​ത്രം മാറ്റി വെച്ച്​ ഭാഷാധ്യാപിക എന്ന റോളിലേക്ക്​ പരകായ പ്രവേശം നടത്താൻ പ്രേരകമായത്​. മൂന്നു കുട്ടികളുമായാണ്​ സ്​കൂളിൽ മലയാളം വകുപ്പിന്​ തുടക്കം കുറിച്ചത്. പിന്നീട്​ ഒരുപാട്​ കുട്ടികൾ മാതൃഭാഷ തെരഞ്ഞെടുക്കുന്നതിലേക്ക്​ ടീച്ചറുടെ പ്രവർത്തനം മലയാളം വകുപ്പിനെ വികസിപ്പിച്ചു. മലയാള സാഹിത്യത്തിലും ടീച്ചർക്ക്​ കമ്പമുണ്ടായിരുന്നു.

കവിതകളും ഗാനങ്ങളും എഴുതുന്നു. മുമ്പ്​ ലേഖനങ്ങളും എഴുതിയിരുന്നു. ആനുകാലികങ്ങളിലും പത്രങ്ങളിലും എഴുതിയതൊക്കെ പ്രകാശിതമായിട്ടുണ്ട്​. ഗാനങ്ങൾ സംഗീത ആൽബങ്ങളായി യൂട്യൂബിൽ ശ്രദ്ധിക്കപ്പെട്ടിട്ടുണ്ട്​. ആദ്യ ഗാനം സംഗീത ആൽബമാകുകയും യൂട്യൂബിൽ ലക്ഷക്കണക്കിന്​ ഹിറ്റുകൾ​ നേടുകയും ചെയ്​തു. അറിയപ്പെടുന്ന യുവ ഗായകനും മലയാള ചലച്ചിത്ര രംഗത്തെ ശ്രദ്ധിക്കപ്പെടുന്ന സംഗീതജ്ഞനുമായ മൂത്ത മകൻ ഹിഷാം അബ്​ദുൽ വഹാബാണ്​ ഉമ്മയുടെ ഗാനങ്ങൾക്ക്​ സംഗീതം പകർന്നതും മറ്റ്​ ഗായകർക്കൊപ്പം പാടി ഹിറ്റാക്കിയതും. അടുത്ത്​ ഹിഷാമി​െൻറ സംഗീത സംവിധാനത്തിൽ ഇറങ്ങാനിരിക്കുന്ന 'ആനപ്പറമ്പിലെ വേൾഡ് കപ്പ്' എന്ന ചിത്രത്തിൽ ഒരു ഗാനം ഷക്കീല ടീച്ചർ എഴുതി. ഇനി ഇൗ രംഗത്തും ഒരു കൈ നോക്കാൻ തന്നെയാണ്​ തീരുമാനം.

റിയാദിലെ നീണ്ടകാലത്തെ പ്രവാസത്തിനിടയിൽ നിരവധി സാമൂഹിക സേവന ജീവകാരുണ്യ പ്രവർത്തനങ്ങളിലും ഷക്കീല ടീച്ചർ സജീവമായിരുന്നു. പ്രവാസി സാമൂഹികരംഗത്തെ സ്​ത്രീശാക്തീകരണത്തിലും കാര്യമായ പങ്കുവഹിച്ചു. നിരവധി നഴ്​സുമാരുടെയും വീട്ടുജോലിക്കാരുടെയും വിഷയങ്ങളിൽ സജീവ ഇടപെടലുകൾ നടത്തി. ദുരിതങ്ങളിൽ അകപ്പെട്ട അത്തരം ആളുകളെ നാടണയാൻ സഹായിച്ചു. റിയാദ് പട്ടണത്തിൽ മാത്രമല്ല ദവാദ്മി, മജ്‌മഅ തുടങ്ങിയ പ്രദേശത്തുള്ളവർക്കുപോലും ടീച്ചറുടെ സേവനങ്ങൾ ലഭിച്ചിട്ടുണ്ട്. കോവിഡ് കാലത്തു മാനസിക സംഘർഷങ്ങളിൽ കഴിഞ്ഞിരുന്ന അനവധി പ്രവാസികൾക്ക് കൗൺസിലിങ്​ നൽകുന്ന തിരക്കിലായിരുന്നു ഇൗ ദിവസങ്ങളിൽ പോലും.

റിയാദിലെ അംഗന സ്ത്രീ കൂട്ടായ്മയുടെ ചെയർപേഴ്‌സൺ, ഈസ്​റ്റ്​ വെനീസ് അസോസിയേഷൻ വനിതാ വിങ് പ്രസിഡൻറ്​, വേൾഡ്​ മലയാളി ഫെഡറേഷൻ മലയാളം മിഷൻ അധ്യാപിക, മലയാളം ടോസ്​റ്റ്​ മാസ്​റ്റർ ക്ലബ്​ പ്രവർത്തക തുടങ്ങിയ നിരവധി പദവികളിലായി സാമൂഹികപ്രവർത്തക മേഖലയിൽ സ്ഥിര സാന്നിധ്യമാണ്​ ഷക്കീല ടീച്ചർ. ഹിഷാമിനെ കൂടാതെ ഒരു മകൻ കൂടിയുണ്ട്​ ഇൗ ദമ്പതികൾക്ക്​. ആമസോൺ ബാംഗ്ലൂർ ശാഖയിൽ ഉദ്യോഗസ്​ഥനായ ഷിയാസ് ഇളയ മകനാണ്​.