ഖത്വീഫിൽ സ്കൂൾ ബസിൽ വിദ്യാർഥി ശ്വാസംമുട്ടി മരിച്ചു

ജിദ്ദ: സൗദി അറേബ്യയുടെ കിഴക്കൻ പ്രവിശ്യയിലെ​ ഖത്വീഫിൽ നഴ്​സറി സ്കൂൾ ബസ്സിൽ മറന്ന അഞ്ച്​ വയസ്സുകാരൻ ശ്വാസം മുട്ടി മരിച്ചു. ഞായറാഴ്​ച ഉച്ചക്ക്​ ശേഷമാണ്​ ദാരുണമായ​ സംഭവമുണ്ടായത്​. സൗദി വിദ്യാർഥിയായ ഹസൻ അലവി എന്ന എന്ന കുട്ടിയാണ്​ ബസിനുള്ളിൽ കിടന്ന്​ ശ്വാസംമുട്ടി മരിച്ചത്​.

വാടകയ്​ക്കെടുത്ത സ്വകാര്യ ബസിലെ ഡ്രൈവർ ബസിൽ കുട്ടിയുള്ളത്​ ശ്രദ്ധിക്കാത്തതിലാണ്​ അപകടമുണ്ടായതെന്ന്​ കിഴക്കൻ മേഖല വിദ്യാഭ്യാസ വക്താവ്​ സഈദ്​ അൽബാഹിസ്​ അറിയിച്ചു. കിഴക്കൻ മേഖല വിദ്യാഭ്യാസ ഓഫീസ്​ ഡയറക്​ടർ ഡോ. സാമീ അൽഉതൈബി സംഭവം അന്വേഷിക്കുന്നുണ്ട്​​​.

സ്​കൂൾ സന്ദർശിക്കാനും ഇത്തം ഘട്ടങ്ങളിൽ ആവശ്യമായ നടപടിക്രമങ്ങൾക്കും ഒരു സംഘം രൂപവത്​കരിക്കാനും നിർദേശിച്ചിട്ടുണ്ട്​. കുട്ടിയുടെ കുടുംബത്തെ കിഴക്കൻ മേഖല വിദ്യാഭ്യാസ കാര്യാലയം അഗാധമായ ദുഃഖം അറിയിച്ചിട്ടുണ്ടെന്നും വക്താവ്​ പറഞ്ഞു.