തിരുവല്ല സ്വദേശി റിയാദിൽ വാഹനാപകടത്തിൽ മരിച്ചു

റിയാദ്​: റിയാദിലെ സ്വകാര്യ ആശുപത്രി ജീവനക്കാരനായ മലയാളി വാഹനാപകടത്തിൽ മരിച്ചു. റിയാദ്​ നസ്​റിയയിലുണ്ടായ അപകടത്തിൽ പത്തനംതിട്ട തിരുവല്ല കുളക്കാട്​ പുളിക്കപറമ്പിൽ സുനിൽ ബാബു (57) ആണ്​ മരിച്ചത്​.

റിയാദ്​ തഖസൂസിയിലെ സ്​പെഷലിസ്​റ്റ്​ മെഡിക്കൽ സെൻററിൽ ഡ്രൈവറാണ്​ ഇദ്ദേഹം. തിങ്കളാഴ്​ചയാണ്​ അപകടമുണ്ടായത്​. പരിക്കേറ്റ സുനിൽ ബാബു ശുമൈസി ആശുപത്രിയിലാണ്​ മരിച്ചത്​. പരേതരായ നാരായണ പിള്ള, ചെല്ലമ്മ ദമ്പതികളുടെ മകനാണ്​.

ഭാര്യ: ഗീത. മക്കൾ: സൂര്യ, ആര്യ (റിയാദ്​ കിങ്​ ഖാലിദ്​ ആശുപത്രി). മൃതദേഹം നാട്ടിൽ കൊണ്ടുപോകും. അതിനുള്ള നടപടിക്രമങ്ങൾ റിയാദ് കെ.എം.സി.സി മലപ്പുറം ജില്ലാ വെൽഫെയർ വിങ്​ ചെയർമാൻ റഫീഖ് പുല്ലൂർ, ജാഫർ വീമ്പൂർ, റഫീഖ് പട്ടാമ്പി എന്നിവരുടെ നേതൃത്വത്തിൽ പുരോഗമിക്കുകയാണ്.