നിലമ്പൂര്‍ സ്വദേശിയെ സൗദിയിലെ ഹാഇലില്‍ മരിച്ച നിലയില്‍ കണ്ടെത്തി

ഹാഇല്‍: മലയാളിയെ ജോലിയിടത്തിലെ താമസസ്ഥലത്ത്​ മരിച്ച നിലയിൽ കണ്ടെത്തി. മലപ്പുറം നിലമ്പൂര്‍ എടക്കര കുന്നുമ്മല്‍പൊട്ടി സ്വദേശി മാനു മമ്മു എന്ന ഉക്കാഷയെയാണ്​ (43) മരിച്ചുകിടക്കുന്നതായി കണ്ടെത്തിയത്​. സൗദിയിലെ ഹാഇൽ പട്ടണത്തിന്​ സമീപം മുറൈഫികിലിലുള്ള ഒരു ഇസ്​തിറാഹയിൽ​ (വിശ്രമ കേന്ദ്രം) രണ്ടുവർഷമായി​ ജോലി ചെയ്യുകയായിരുന്നു​.

ഇവിടെയാണ്​ മൃതദേഹം കണ്ടെത്തിയത്​. മൃതദേഹം ഹാഇലില്‍ തന്നെ ഖബറടക്കുമെന്നും ​രേഖകൾ ശരിയാക്കുന്നതടക്കമുള്ള അനന്തര നടപടിക്രമങ്ങള്‍ ശരിയാക്കിവരുന്നതായും ഹാഇല്‍ കെ.എം.സി.സി വെല്‍ഫയര്‍ വിഭാഗം അറിയിച്ചു.