സൗദിയിലെ അഫീഫിൽ ബസിന്​ തീപിടിച്ചു

ജിദ്ദ: റിയാദ്​ പ്രവിശ്യയിലെ അഫീഫിൽ യാത്രക്കാരുമായ പോയ ബസിൽ തീപിടിത്തം. റിയാദിൽനിന്ന്​ 500 കിലോമീറ്റർ അകലെ അഫീഫ്​-ദറഇയ റോഡിൽ വ്യാഴാഴ്​ച രാത്രി 40 യാത്രക്കാരുമായി പോകുന്ന സ്വകാര്യ ബസിനാണ്​​ തീപിടിച്ചത്​. പിൻഭാഗത്തെ ടയർ പൊട്ടിത്തെറിച്ചതിനെ തുടർന്നാണ്​ തീപിടിത്തമെന്നാണ്​ വിവരം. തീ ആളിപ്പടരുന്നതിന്​ മുമ്പ്​ യാത്രക്കാർക്ക്​ ബസിൽനിന്ന്​ ഇറങ്ങാനായതിനാൽ വൻ ദുരന്തം​ ഒഴിവായി.

സിവിൽ ഡിഫൻസ്​ എത്തിയാണ്​ തീ അണച്ചത്​. യാത്രക്കാരിൽ ആർക്കും പരിക്കേറ്റിട്ടില്ലെന്ന്​ സിവിൽ ഡിഫൻസ്​ പറഞ്ഞു. ട്രാഫിക്​ ഉദ്യോഗസ്ഥർ സ്ഥലത്തെത്തുകയും കനത്ത മഴയുടെ സാഹചര്യത്തിൽ യാത്രക്കാരെ സുരക്ഷിത സ്ഥാനത്തേക്ക്​ മാറ്റുകയും ചെയ്​തു.